Thuni shpërthen ndaj Dinamos së Zagrebit: Na eliminuan me lojë josportive

Skuadra zvicerane akuzon kroatët për mungesë “fair play”, ndërsa kartoni i kuq ndaj Marco Burkit ndryshoi rrjedhën e ndeshjes

Kampioni i Zvicrës, Thuni, ka shprehur pakënaqësi të madhe ndaj Dinamos së Zagrebit pas eliminimit dramatik nga Liga e Kampionëve, duke akuzuar skuadrën kroate për sjellje josportive në një moment vendimtar të ndeshjes, transmeton albinfo.ch.

Thuni ishte në epërsi 2:0 në stadiumin “Maksimir”, por gjithçka ndryshoi në minutën e 67-të, kur kapiteni Marco Burki u ndëshkua me karton të kuq pas ndërhyrjes së VAR-it. Me një futbollist më shumë në fushë, Dinamo arriti të barazojë rezultatin në 2:2 dhe më pas shënoi edhe golin e fitores 3:2 në vazhdime, duke siguruar kualifikimin në raundin e tretë kualifikues të Ligës së Kampionëve.

Incidenti që shkaktoi polemika ndodhi pasi mbrojtësi i djathtë i Thunit, Fabio Fehr, mbeti i lënduar në fushë. Portieri Niklas Steffen e nxori topin jashtë loje që futbollistit t’i jepej ndihma e parë.

Në shenjë të “fair play”-t, Fran Topiq i Dinamos ia ktheu topin skuadrës zvicerane, por bashkëlojtari i tij Lukas Kaçavenda ushtroi menjëherë presion ndaj Marco Burkit, ia mori topin, ndërsa mbrojtësi i Thunit ndërhyri me faull. Fillimisht u ndëshkua me karton të verdhë, por pas rishikimit në VAR, arbitri e ndryshoi vendimin dhe e përjashtoi me karton të kuq.

Pas ndeshjes, trajneri i Thunit, Gian-Luca Privitelli, nuk i kurseu kritikat ndaj Dinamos.

“Ata ishin skajshmërisht jokorrekt. Një karton i tillë i kuq nuk do të jepej në Zvicër”, deklaroi ai.

Edhe futbollisti Justin Roth akuzoi skuadrën kroate për mungesë “fair play”, duke vlerësuar se incidenti ndikoi drejtpërdrejt në rrjedhën e ndeshjes dhe në eliminimin e kampionit zviceran nga gara më prestigjioze evropiane për klube./Albinfo.ch

---