“Vendlindja ime është tani në Google Maps Street View”, Dua Lipa promovon Prishtinën me një video të veçantë

Këngëtarja me famë botërore ftoi ndjekësit të eksplorojnë Prishtinën përmes Google Maps Street View, duke prezantuar vendet e saj të preferuara dhe duke e cilësuar Sunny Hill Festival si një ëndërr të bërë realitet.

Këngëtarja me famë botërore, Dua Lipa, ka publikuar në llogarinë e saj në Instagram një video të veçantë kushtuar Prishtinës, përmes së cilës promovon kryeqytetin e Kosovës dhe njofton se ai tashmë mund të eksplorohet edhe përmes Google Maps Street View, transmeton albinfo.ch.

Në përshkrimin e videos, artistja shkruan: “Mirë se vini në Prishtinë! Sot është dita e parë e Sunny Hill Festival dhe, për ta festuar këtë, të gjitha restorantet, arkitektura dhe kultura që unë i dua tani mund të eksplorohen në Google Maps Street View.”

Në video, Dua Lipa flet për lidhjen e saj të veçantë me qytetin ku u rrit dhe i fton të gjithë ta zbulojnë Prishtinën përmes syve të saj.

“Asnjëherë nuk mund ta njohësh një vend derisa ta shohësh me sytë e tu. Vendlindja ime, Prishtina, është tani në Google Maps Street View”, shprehet ajo.

Artistja prezanton disa nga vendet që kanë një rëndësi të veçantë për të, përfshirë librarinë Dukagjini, të cilën thotë se e viziton sa herë ndodhet në Prishtinë, pasi aty gjen gjithmonë një libër në gjuhën shqipe që nuk e ka lexuar më parë.

Ajo ndalet gjithashtu në disa restorante dhe bare të kryeqytetit, të cilat, sipas saj, pasqyrojnë kulturën shqiptare, energjinë dhe atmosferën unike të Prishtinës.

Në fund të videos, Dua Lipa i kushton vëmendje edhe Sunny Hill Festival, të cilin e cilëson si një ëndërr të bërë realitet dhe një ngjarje që mishëron frymën e qytetit, duke mbledhur çdo vit mijëra vizitorë dhe artistë nga vende të ndryshme.

Publikimi i videos përkon me nisjen e edicionit të sivjetmë të Sunny Hill Festival dhe shërben njëkohësisht si promovim i Prishtinës, kulturës së saj dhe mundësisë që kryeqyteti tashmë të eksplorohet virtualisht përmes Google Maps Street View. /Albinfo.ch

---