Në Shkodër nis festivali “Marubi”

Nga data 16 korrik deri më 7 gusht 2014 qyteti i Shkodrës do të jetë një vendtakim kulturor për shkodranët, por edhe për turistët që do ta vizitojnë qytetin.

Një javë pas inaugurimit të Marubi Route, Bashkia e Shkodrës në kuadër të programit “IPA Cross-border” të Bashkimit Evropian vazhdon me programin e saj për të ringjallur vlerat e harruara të kulturës shqiptare. Programi do të jetë gjithëpërfshirës. Do të ketë një konkurs të fotografisë dhe aktivitete që do ta mbajnë gjallë jetën kulturore artistike të Shkodrës gjatë ditëve të verës.

Kjo iniciativë historiko-kulturore organizohet për herë të parë në qytetin e Shkodrës, në kuadër të projektit “Marubi, një model bashkëpunimi për promovimin e turizmit ndërmjet Shkodrës dhe Ulqinit, një projekt ndërkufitar IPA Shqipëri – Mali i Zi, i financuar nga Bashkimi Evropian në Tiranë.

Kjo iniciativë i shërben çdo shkodrani e çdo shqiptari, që të ndërgjegjësohet  për vlerat që bart një qytet bashkëkohor e tradicional, siç është Shkodra.

Nga data 16 korrik deri më 7 gusht 2014 qyteti i Shkodrës do të jetë një vendtakim kulturor për shkodranët, por edhe për turistët që do ta vizitojnë qytetin.

Konkursi i fotografisë: “Eja fotografo Shkodrën dhe fito” do të mbahet nga 19 deri më 20 korrik.

Çmime të ndryshme për një pasion të madh, në një qytet të mrekullueshëm! Më datë 19 korrik konkursi 1-ditor i fotografisë.

Konkurs i hapur për të gjithë të pasionuarit e fotografisë, si dhe seminare përgjatë fundjavës nga fotografët më të mirë shqiptarë.