Maqedonia nuk lejon ndërtimin e kampeve për refugjatë

Presidenti Gjorgje Ivanov tha se Maqedonia është e gatshme të bashkëpunoj me Greqinë për refugjatët, por nuk do të lejë ndërtimin e kampeve brenda shtetit të saj

Keystone

Presidenti i Maqedonisë, Gjorge Ivanov ka deklaruar se shteti i tij nuk do të lejojë ngritjen e kampeve për refugjatë nga Siria dhe zonat tjera të luftës. Ai ka thënë se Shkupi zyrtar është i gatshëm të bashkëpunoj me Greqinë për refugjatët, por nuk do ta marrë barrën që ata t’i ndaloj në kampe brenda shtetit.

Këto komente Ivanov i ka bërë gjatë një takimi që ka zhvilluar me kryesuesin e Këshillit të Evropës, Donalld Tusk. Me këtë të fundit, kanë diskutuar rreth krizës me refugjatët dhe përpjekjet për arritjen e një zgjidhje të përbashkët evropiane.

Presidenti Ivanov e ka informuar kreun e Këshillit të Evropës për masat dhe aktivitetet që ka ndërmarrë Republika e Maqedonisë në ballafaqimin me krizën e refugjatëve.  “Kërkojmë dhe presim zgjidhje nga Këshilli i Evropës dhe nuk kemi kurrfarë interesi që e gjithë barra të bie mbi Greqinë, por nuk do të lejojmë që të realizohen zgjidhje të njëanshme, që do të shkojnë në dëm tonin. Republika e Maqedonisë do të bashkëpunoj me fqinjin jugor për tejkalimin e sfidave nga kriza me refugjatët”, ka theksuar Ivanov, duke kundërshtuar mundësinë që në Maqedoni të ndërtohen kampe.

Ndryshe, një ditë më parë, gjendja e sigurisë në kufirin ndërmjet Maqedonisë dhe Greqisë ka dalë jashtë kontrollit pasi një grup i refugjatëve afro-aziatikë, që ishin të ngujuar në zënën e askujt, tentuan të hyjnë dhunshëm në Republikën e Maqedonisë. Për t’i parandaluar ata, Policia maqedonase përdori gazin lotsjellës.

Situata u rëndua kur refugjatët e ngujuar në anën greke, shkulën portën e hekurt të përforcuar me tela me gjemba mes dy vendeve.

Ndërkaq qindra të tjerë u ulën në binarët e hekurudhës duke refuzuar të çoheshin derisa t’iu lejohet të kalojnë kufirin. Besohet se në kampin në Idomeni, që paraqet pikën kryesore të tranzitimit të refugjatëve, janë grumbulluar rreth 8 mijë persona edhe pse ky kamp ka kapacitet për vetëm 2500.

Ushtria e Maqedonisë në anën tjetër, po ngre një gardh të ri me gjemba në kufij. Maqedonia nuk pranon më shumë se 300 refugjatë në ditë, të cilët pas pak orë qëndrimi në kampet e Gjevgjelisë dhe Tabanocit udhëtojnë drejt vendeve perëndimore. Agjencia e Kombeve të Bashkuara për Refugjatët thotë se kalimi i refugjatëve nëpër Maqedoni nuk duhet të paraqesë problem për vendin, përderisa ata nuk ndalen për një kohë më të gjatë këtu.