Kroacia, nga viti 2023 hyn në zonën Shengen

Ndryshe nga Kroacia, Rumania dhe Bullgaria edhe pse janë anëtare të BE-së, nuk do të përfshihen në zonën Shengen

Nga viti i ardhshëm, më 1 janar 2023 edhe Kroacia do të jetë pjesë e zonës Shengen. Si rezultat i kësaj, kontrollet e pasaportave në kufijtë kombëtarë me vendet e tjera të Shengenit në përgjithësi  do të eliminohen, transmeton albinfo.ch. Kjo vlen edhe për kontrollet në aeroporte.

Ministrat përgjegjës të 26 vendeve evropiane kanë miratuar sot  në mbledhjen e tyre të përbashkët pranimin e Kroacisë në zonën Shengen. Zvicra është një nga këto vende, shkruan srf.ch.

Ndryshe nga Kroacia, Rumania dhe Bullgaria edhe pse janë anëtare të BE-së, nuk do të përfshihen në zonën Shengen. Pranimi i tyre në zonën Shengen u bllokua kryesisht nga Austria. Të dy vendet janë në pritje të pranimit në këtë zonë që nga viti 2011.

Në të njëjtën kohë, pra, me fillimin e vitit 2023, Kroacia do ta marrë euron si mjet pagese.

Zona Shengen aktualisht përfshin 22 vende të BE-së, si dhe Norvegjinë, Lihtenshtajnin, Islandën dhe Zvicrën, transmeton albinfo.ch. Zakonisht nuk ka kontrolle të palëvizshme kufitare në kufijtë e brendshëm ndërmjet këtyre vendeve. Kjo e bën atë zonën më të madhe në botë të lirisë për të udhëtuar.

---