Kosova
Kongresmenët amerikanë kërkojnë Asociacion për shqiptarët në Luginë
![](https://www.albinfo.at/wp-content/uploads/files/permendorja ne preshevë-587x367.jpg)
Kongresmenët Ritchie Torres dhe Jim Himes, me një letër drejtuar kreut të Departamentit të Shtetit Amerikan, Anthony Blinken, kanë kërkuar të drejta të njëjta edhe për shqiptarët e Luginës së Preshevës.
Letrën që e nisën në prag të takimit të Ohrit, kongresmenët theksojnë rëndësinë për një marrëveshje gjithëpërfshirëse mbi normalizimin e marrëdhënieve, e po ashtu edhe njohjen reciproke, shkruan Top Channel, përcjell albinfo.ch.
“Nga sa kuptojmë, plani aktual nuk përfshin përmendjen e të drejtave të minoriteteve, apo nevojë për t’u siguruar që të merren masa në mënyrë që të tilla të drejta të respektohen. Ju nxisim të insistoni për përfshirjen e kësaj cështjeje në ujdinë përfundimtare”, thuhet në letër, shkruan TCH, përcjell albinfo.ch.
Dy kongresmenët kujtojnë se së fundi është raportuar që Asociacioni i komunave me shumicë serbe do të inkorporohet në procesin e dialogut në mënyrë që të garantohen të drejtat e pakicës serbe që jeton në Kosovë. “Duke pasur parasysh historinë e konfliktit në këtë rajon, dështimi në sigurimin e këtyre të drejtave në mënyrë të ndershme e të qëndrueshme mund të rrezikojë të gjitha aspektet e tjera të marrëveshjes”, thuhet në letër, raporton TCH, përcjell albinfo.ch.
Kongresmenët kërkojnë nga Blinken të mbështesë këtë reciprocitet dhe një asociacion për komunitetin shqiptar që jeton në Serbi.
“Ne e përkrahim me forcë dialogun dhe inkurajojmë trajtimin e njëjtë të minoriteteve në të dy vendet”, përfundon letra.