I zgjatet mandati SWISSCOY-t deri më 2014

Një aleancë e lidhur për këtë rast në mes të SVP-së dhe të Gjelbërve nuk ia doli për të ndërprerë mandatin e SWISSCOY-t

Pasi që Dhoma e Kantoneve e kishte miratuar javë më parë, sot edhe Dhoma Federale e Parlamentit Nacional të Zvicrës ka votuar për vazhdimin e mandatit të SWISSCOY-t në Kosovë deri në vitin 2014.

Një aleancë e lidhur për këtë rast në mes të SVP-së dhe të Gjelbërve nuk ia doli për të ndërprerë mandatin e SWISSCOY-t. Kjo për shkakun se shumica e deputetëve të partive tjera votoi vazhdimin e mandatit të forcave ushtarake të Zvicrës në Kosovë ku ato veprojnë në kuadër të KFOR-it që nga viti 1999.

94 deputetë votuan pro, 65 kundër dhe 9 abstenuan. Prania e Zvicrës është më se i nevojshëm për shkak të situatës së paqëndrueshme në Kosovë. Po ashtu motiv plotësues është edhe solidariteti ndërkombëtar. Ministri i mbrojtjes Ueli Maurer ka arsyetuar nevojën për vazhdim dhe rritje të angazhimit ushtarak të Zvicrës në Kosovë.

Parlamenti po ashtu votoi edhe për rritjen e numrit të ushtarëve të SWISSCOY-t nga 220 sa janë tash në 300.