Dhoma Nacionale kundër shkurtimit të pensioneve

Ajo është deklaruar të enjten për të tretën herë që personat me shkallë invaliditetit 70 për qind duhet të kenë të drejtë për pension të plotë

Dhoma Nacionale dhe ajo e kantoneve, në Parlamentin e Zvicrës nuk po munden të gjejnë një zgjidhje të pranueshme për të dyja palët lidhur me rishikimin e Ligjit për pensionet e invaliditetit. Kështu, ndërkohë që Dhoma e Kantoneve këmbëngul për masa kursimi, Dhoma Nacionale shprehet kundër asaj që edhe njerëzve me të meta të rënda tu shkurtohen pensionet.

Për të gjetur një zgjidhje, do të zhvillohet një konferencë unifikimi, e përbërë nga anëtarë të të dyja dhomave.

Dhoma Nacionale është deklaruar të enjten për të tretën herë që personat me shkallë invaliditetit prej 70 për qind edhe më tutje të kenë të drejtë për pension të plotë. Në votimin e mbajtur  sot , 103 kanë qenë pro, 79 kundër dhe një abstenim.

Nga ana tjetër edhe Dhoma e Kantoneve ka vendosur tashme tri herë, me shumicë votash, që të ndiqen rekomandimet e Qeverisë. E ato thonë se në të ardhmen, pensione të plota mund të marrin vetëm personat që dëshmojnë invaliditet në shkallën prej 80 për qind.