Dentistët refuzojnë sigurimin e dhëmbëve

Preteksti i refuzimit: « …njerëzit do të jenë më pak të motivuar t’i lajnë dhëmbët»

Në një letër drejtuar Komisionit për shëndetësi publike (KSHP), Shoqata zvicerane e dentistëve (SHZD) i kundërvihet në mënyrë kategorike idesë së sigurimit të dhëmbëve.

Në Zvicër, në të shumtën e rasteve, shpenzimet e dhëmbëve nuk mbulohen nga sigurimet për shëndetësi.

Prandaj, iniciativa e parlamentarit socialist, Jean-Charles Rielle, në favor të mbulimit nga ana e sigurimit të trajtimit të sëmundjeve të dhëmbëve ka hasur në kundërshtim të KSHP-së, i cili e ka refuzuar tekstin në fjalë. Fjala e fundit i mbetet parlementit, njofton «Le Matin».

Ndërkohë, banorët e Zivrës do të vazhdojnë ta paguajnë faturën e shtrenjtë që kap shumën e 3.3 miliardë frangash zvicerane në vit.

Argumenti zyrtar i SHZD-së për ta refuzuar idenë e një sigurimi për dhëmbët është kjo se « …njerëzit do të jenë më pak të motivuar t’ i lajnë dhëmbët». Për parlamentarin socialist, J.-Ch. Rielle, kjo është një pretekst për të mos i prekur interesat e dentistëve si dhe t’iu bëhet presion ndaj tarifave që ata i praktikojnë.

Sipas një sondazhi të spitaleve universitare të Gjenevës, 14.5 % e personave të pyetur ua heqin trajtimin e dhëmbëve për arsye të kostos së shtrenjtë të tyre.

Mirëpo, sipas Dr. Idris Gessous, zëdhënës i SHZD-së, ideja e një katalogu të saktë të mbulimit të trajtimeve të sëmundjeve të dhëmbëve mund të arsyetohet, ngase nëse disa sëmundje nuk trajtohen me kohë, ato mund të shkaktojnë dëme në zemër dhe në trurin e njeriut.