Archives

EuroAirport i Bazelit mbyll pothuajse plotësisht pistën kryesore për disa javë

Posted on by Drin Reçica

EuroAirport Basel–Mulhouse–Freiburg do të ndërpresë pothuajse të gjitha fluturimet për disa javë për shkak të rinovimit të pistës kryesore. Punimet do të zgjasin nga 15 prilli deri më 20 maj 2026, periudhë gjatë së cilës shumica e kompanive ajrore që operojnë në këtë aeroport kanë anuluar fluturimet e tyre, përcjell albinfo.ch.

Sipas njoftimit të aeroportit, gjatë kësaj kohe do të përdoret vetëm pista dytësore, e cila është më e shkurtër. Për këtë arsye, më shumë se 25 kompani ajrore që zakonisht operojnë nga ky aeroport kanë vendosur të pezullojnë përkohësisht fluturimet, pasi pista alternative nuk konsiderohet e përshtatshme për avionët e tyre.

Megjithatë, kompania ajrore me kosto të ulët EasyJet do të vazhdojë operimet me një numër të reduktuar fluturimesh. Ajo do të kryejë rreth shtatë fluturime në ditë, që përfaqësojnë rreth 15 për qind të aktivitetit të saj të zakonshëm në këtë aeroport.

Gjatë kësaj periudhe, EasyJet do të përdorë avionë të tipit Airbus A320 për të fluturuar vetëm drejt disa destinacioneve më të afërta në Evropë, përfshirë Hamburg, Palermo, London, Palma de Mallorca, Porto dhe Barcelona.

Arsyeja është se për fluturimet në distanca më të shkurtra avionët mbajnë më pak karburant, duke qenë më të lehtë dhe duke mundësuar përdorimin e pistës dytësore.

Megjithatë, operimet do të përballen edhe me disa sfida. Pista dytësore nuk është e pajisur me sistemin e uljes me instrumente (ILS), që do të thotë se pilotët duhet të kryejnë uljen vetëm me orientim vizual. Për këtë kërkohet një dukshmëri minimale prej të paktën pesë kilometrash, ndërsa kushtet e vështira të motit si stuhitë, reshjet e dendura të shiut apo erërat e forta mund të kufizojnë fluturimet./Albinfo.ch

Sot dita e tretë e Samitit të Diasporës, ja çfarë përfshin agjenda

Posted on by Drin Reçica

Dita e tretë dhe e fundit e Samitit të Diasporës Shqiptare mbahet sot në Pallatin e Kongreseve në Tiranë, ku pjesëmarrësit do të ndjekin një agjendë të pasur me diskutime dhe panele tematike, shkruan albinfo.ch.

Sipas programit, aktiviteti do të nisë me një moment reflektimi dhe bashkimi shpirtëror, ku krerë të komuniteteve fetare në vend do të përcjellin lutje dhe mesazhe paqeje, harmonie dhe shprese.

Më pas do të zhvillohen panele diskutimi mbi tema të rëndësishme si integrimi në Bashkimin Evropian, migracioni, identiteti kombëtar dhe komunikimi, me pjesëmarrjen e ministrave, drejtuesve institucionalë, përfaqësuesve të diasporës dhe figurave të tjera publike.

Sipas agjendës zyrtare të publikuar nga Ministria për Evropën dhe Punët e Jashtme, pjesëmarrësit do të kenë mundësi të diskutojnë dhe të eksplorojnë fusha të ndryshme me interes për zhvillimin e vendit dhe rolin e diasporës, përfshirë ekonominë, inovacionin, arsimin, shëndetësinë, artin dhe ruajtjen e identitetit kombëtar.

Në fokus të ditës do të jetë gjithashtu roli i diasporës shqiptare si faktor strategjik në përshpejtimin e integrimit evropian, trashëgimia kulturore dhe gjuhësore e komuniteteve arbëreshe, si dhe kontributi i diasporës në zhvillimin e sektorëve të ndryshëm ekonomikë, përfshirë bujqësinë dhe agropërpunimin.

Samiti i Diasporës u hap dy ditë më parë me një ceremoni mirëseardhjeje në Teatrin Kombëtar të Operas dhe Baletit, ku morën pjesë Presidenti Bajram Begaj, Kryeministri Edi Rama, ministra, deputetë, drejtues institucionesh dhe personalitete nga diaspora, duke i dhënë kësaj ngjarjeje përmasa të një feste kombëtare./Albinfo.ch

“Zërat e Diasporës” panel i veçantë në kuadër të Samitit të Diasporës Shqiptare

Posted on by Drin Reçica

Në kuadër të Samitit të Diasporës Shqiptare, Teatri Kombëtar i Operës, Baletit dhe Ansamblit Kombëtar organizon panelin “Zërat e Diasporës – Krijimtaria, identiteti dhe fryma shqiptare në artin bashkëkohor”, i cili do të mbahet nga ora 17:00 deri në 18:15, shkruan albinfo.ch.

Paneli, nën kujdesin e Ministrisë së Turizmit, Kulturës dhe Sportit, do të fokusohet në rolin e artistëve shqiptarë në diasporë si bartës dhe promovues të identitetit kulturor në një kontekst global, duke trajtuar ndikimin e tyre në skenën ndërkombëtare të artit.

Në këtë diskutim do të marrin pjesë:

• Aulon Naçi (Drejtor i Përgjithshëm i TKOBAP)

• Gëzim Myshketa (bariton)

• Salvatore Frega (kompozitor)

• Anbeta Toromani (balerinë)

• Marigona Qerkezi (soprano)

Aktiviteti do të përmbyllet me një përshëndetje artistike nga pjesëmarrësit, duke i dhënë takimit një dimension të veçantë kulturor dhe emocional./Albinfo.ch

Aktorja shqiptare Lyra Xhoci pjesë e një seriali në Netflix

Posted on by Drin Reçica

Aktorja shqiptare nga Kanadaja, Lyra Xhoci, po shënon një hap të rëndësishëm në karrierën e saj, duke u bërë pjesë e një produksioni të transmetuar në Netflix, transmeton albinfo.ch.

Ajo luan rolin e infermieres Angela në serialin dramatik me tetë episode “Ripple”, i cili u publikua më 3 dhjetor 2025. Xhoci shfaqet në gjashtë episode, ndërsa personazhi i saj ka një rol të rëndësishëm në zhvillimin emocional të ngjarjes, që rrëfen historinë e katër personazheve në New York.

Lyra Xhoci është e njohur edhe për publikun shqiptar, falë angazhimeve në serialet “Kafeneja Jonë” dhe “Zyrja Për Gjithçka”, si dhe për pjesëmarrjen në filmin “Tri Dritare dhe Një Varje” (2014), i cili përfaqësoi Kosovën për herë të parë në garën për Oscar.

Pjesëmarrja në një projekt ndërkombëtar të shpërndarë në Netflix konsiderohet një tjetër sukses për aktoren, duke e afruar edhe më shumë me industrinë globale të filmit dhe televizionit./Albinfo.ch

 

Tedi Papavrami sjell “24 Kapriçot” e Paganinit në TKOBAP

Posted on by Drin Reçica

Teatri Kombëtar i Operës, Baletit dhe Ansamblit Popullor ka njoftuar një ngjarje të veçantë muzikore: violinisti i njohur Tedi Papavrami do të interpretojë veprën monumentale “24 Kapriçot” të kompozitorit legjendar Niccolò Paganini, në një premierë absolute, transmeton albinfo.ch.

“24 Kapriçot” për violinë solo konsiderohen ndër veprat më themelore të repertorit violinistik botëror, të kompozuara nga Paganini në periudhën 1802–1817. Kjo kryevepër përfaqëson kulmin e virtuozitetit romantik dhe përfshin teknika novatore si ricochet, pizzicato me dorën e majtë, oktat dhe decima, duke u cilësuar si një sfidë e jashtëzakonshme për çdo violinist.

Me një interpretim të spikatur dhe ndjeshmëri të rrallë artistike, Tedi Papavrami, një nga figurat më të vlerësuara të violinës shqiptare në arenën ndërkombëtare, do ta sjellë këtë vepër të plotë në skenën e TKOBAP-it, më datë 12 & 13 Maj, në ora 20:00, në sallen e TKOBAP-së./Albinfo.ch

 

Alda Dizdari do të sjell një mbrëmje të veçantë të muzikës klasike në Londër

Posted on by Drin Reçica

Më 29 prill, në ambientet e “St James’s Piccadilly” në Londër, do të mbahet një koncert i veçantë i muzikës klasike, i organizuar nga DEA Music, duke filluar nga ora 19:30, transmeton albinfo.ch.

Në qendër të kësaj mbrëmjeje artistike do të jetë violinistja virtuozë Alda Dizdari, e cila do të interpretojë e shoqëruar nga London International Concert Orchestra, nën drejtimin e dirigjentit Alexander Walker. Bashkëpunimi mes Dizdarit dhe Walker është vlerësuar ndër vite për projekte të suksesshme, përfshirë edhe një regjistrim të fundit që ka marrë vlerësime të shumta nga kritika.

Programi i koncertit do të sjellë para publikut vepra nga tre emra të mëdhenj të muzikës klasike botërore: Antonín Dvořák, Jean Sibelius dhe Pyotr Ilyich Tchaikovsky, duke ofruar një udhëtim të pasur emocional dhe artistik.

Mbrëmja do të hapet me kompozimin “In Nature’s Realm” të Dvořák, një vepër e ndritshme që reflekton energjinë dhe bukurinë e natyrës. Më pas, publiku do të ketë mundësinë të shijojë Koncertin për violinë të Sibelius, një nga veprat më të fuqishme të repertorit violinistik, ku Alda Dizdari pritet të sjellë një interpretim të mbushur me virtuozitet dhe ndjeshmëri.

Koncerti do të përmbyllet me Simfoninë nr. 4 të Tchaikovsky-t, një kryevepër e njohur për dramën, pasionin dhe intensitetin emocional, që pritet të mbyllë mbrëmjen në mënyrë mbresëlënëse.

London International Concert Orchestra vazhdon të tërheqë interes të madh, duke ndërthurur muzikantë me përvojë nga orkestrat kryesore të Londrës me talente të rin/Albinfo.ch

Dua Lipa zë vendin e George Clooney në reklamën e re të Nespresso

Posted on by Drin Reçica

Nespresso ka prezantuar fytyrën e saj më të re: këngëtarja me famë botërore Dua Lipa. Prodhuesi zviceran i kapsulave të kafesë, që është pjesë e kompanisë Nestlé, e angazhoi atë në mes të muajit mars si ambasadore të re të markës, ndërsa tani ka nisur zyrtarisht fushatën e madhe promovuese me të, transmeton albinfo.ch.

Së fundmi është publikuar edhe spot-i i parë reklamues, me kohëzgjatje rreth 30 sekonda, ku Dua Lipa shfaqet duke provuar lloje të ndryshme të kafesë dhe duke udhëtuar simbolikisht në vende të ndryshme të botës. Reklama e çon atë në një “udhëtim” përmes kulturave dhe atmosferave të ndryshme, nga New Yorku, në Itali, e deri në Francë.

Mesazhi kryesor i fushatës së re është se çdo filxhan kafeje është një ftesë për të zbuluar diçka të re.

Në një moment të spotit, Dua Lipa me humor “ia merr” sloganin e famshëm të George Clooney-t: “What else?”, i cili për vite me radhë ishte sinonim i reklamave të Nespresso. Megjithatë, Clooney mbetet ende pjesë e markës dhe shfaqet gjithashtu në reklamë me një paraqitje të shkurtër si mysafir.

Nespresso synon që përmes kësaj fushate të re dhe trendeve moderne të kafesë, të tërheqë sidomos audiencën më të re. Dua Lipa, e cila ka fituar tre çmime Grammy dhe është ndër artistet më të dëgjuara në botë, pritet të sjellë një imazh më bashkëkohor për markën.

Në këtë mënyrë, Nespresso po e rinovon strategjinë e saj të marketingut duke bashkuar një ikonë të vjetër si George Clooney me një yll të ri global si Dua Lipa./Albinfo.ch

Dua Lipa InstaStory

SWISS zgjat pezullimin e fluturimeve drejt Dubait deri më 11 korrik

Posted on by Alb

Kompania ajrore zvicerane SWISS International Air Lines ka njoftuar se do të vazhdojë pezullimin e fluturimeve drejt dhe nga Dubai deri më 11 korrik, për shkak të situatës së paqëndrueshme në Lindjen e Mesme.

Fillimisht, pezullimi ishte parashikuar të zgjaste deri në fund të majit, por vendimi është zgjatur pas vlerësimeve të reja të situatës, bëri të ditur kompania të martën, transmeton albinfo.ch.

SWISS theksoi se zhvillimet po monitorohen vazhdimisht në koordinim me Lufthansa Group dhe autoritetet përkatëse në Zvicër dhe në vendet e prekura. Pasagjerët e prekur nga anulimet mund të riplanifikojnë udhëtimin në një datë tjetër ose të kërkojnë rimbursim të plotë të biletës.

Në fund të marsit, SWISS dhe kompani të tjera të Lufthansa Group kishin njoftuar gjithashtu pezullimin e fluturimeve drejt Tel Avivit deri në fund të majit.

Ndërkohë, fluturimet drejt disa destinacioneve në rajon do të mbeten të pezulluara deri më 24 tetor. Këto përfshijnë Abu Dabin, Amanin, Bejrutin, Riadin, Erbilin, Dammamin, Muskatin dhe Teheranin.

Kompania ajrore nuk ka dhënë një afat të ri për rifillimin e plotë të operimeve në këto linja, duke theksuar se vendimet do të varen nga zhvillimet e sigurisë në rajon.

Dyshime për abuzim në një çerdhe në Bern: A dështuan autoritetet?

Posted on by Alb

Dy raste të ndara me të njëjtën dyshim për sjellje të papërshtatshme ndaj fëmijëve në një çerdhe të lidhur me një kompani në qytetin e Bernës kanë ngritur pyetje serioze mbi reagimin e institucioneve dhe menaxhmentit.

Sipas raportimeve, prindërit e parë kishin ngritur shqetësime që në verën e vitit 2025, duke dyshuar se një punonjës i çerdhes kishte prekur në mënyrë të papërshtatshme një fëmijë. Megjithatë, atëherë nuk u ndërmorën masa konkrete.

Vetëm në shkurt të vitit 2026, pas një raportimi të dytë nga një grup tjetër prindërish me të njëjtën dyshim, çështja u vu në lëvizje. Punonjësi në fjalë u pezullua dhe autoritetet mbikëqyrëse nisën hetimet.

Menaxhmenti i kompanisë ka deklaruar se nuk ishte në dijeni të rastit të parë deri në momentin kur po hetonte rastin e dytë. “Vetëm gjatë hetimeve në shkurt 2026 u mësua për dyshimin e mëhershëm që daton nga qershori 2025,” thuhet në përgjigjen e tyre.

Pas zhvillimeve, të gjithë prindërit, fëmijët e të cilëve kanë qenë në çerdhe gjatë periudhës kur ka punuar punonjësi i dyshuar, janë informuar për rastin.

Hetim i brendshëm dhe ekspertë të pavarur

Institucioni ka bërë të ditur se po bashkëpunon me autoritetet përkatëse dhe ka nisur rishikimin e procedurave të brendshme me ndihmën e ekspertëve të jashtëm. Qëllimi është forcimi i politikave të mbrojtjes së fëmijëve dhe parandalimi i rasteve të ngjashme në të ardhmen.

Sipas kompanisë, punonjësi i dyshuar është pezulluar nga detyra, ndërsa për arsye privatësie nuk jepen detaje për rolin apo kohëzgjatjen e punës së tij. Drejtuesja e çerdhes, sipas raportimeve, nuk është më në këtë pozitë që nga shkurti 2026.

Roli i autoriteteve dhe detyrimi për raportim

Në kantonin e Bernës, çerdhet janë të detyruara me ligj që të raportojnë menjëherë çdo shkelje serioze ose dyshim të tillë tek zyra kantonale për integrim dhe çështje sociale.

Megjithatë, mbetet e paqartë nëse të dy rastet janë raportuar në kohë. Zëdhënësi i zyrës kantonale ka deklaruar se nuk mund të komentojë raste individuale për shkak të hetimeve në vazhdim, por ka theksuar se çdo sinjal i rrezikut për mirëqenien e fëmijëve trajtohet me seriozitet të lartë.

Hetimet vazhdojnë

Autoritetet kantonale po shqyrtojnë nëse institucionet përkatëse kanë vepruar në përputhje me detyrimet ligjore. Rasti ka nxitur debat mbi transparencën dhe reagimin e shpejtë në institucionet që kujdesen për fëmijët.

Ulja e taksave të karburantit: Ekonomistët paralajmërojnë pasoja për buxhetin dhe çmimet

Posted on by Alb

Debat për uljen e taksave të karburanteve në Zvicër

Rritja e çmimeve të benzinës dhe naftës, e lidhur me tensionet ndërkombëtare, ka shtuar presionin mbi familjet dhe ekonomitë në Evropë. Disa shtete fqinje të Zvicrës, si Gjermania, kanë vendosur të ulin taksat mbi karburantet për të lehtësuar kostot për qytetarët.

Megjithatë, ekonomisti dhe drejtori i KOF/ETH, Hans Gersbach, vlerëson se kjo masë nuk është zgjidhja më e përshtatshme për Zvicrën. Sipas tij, një ulje e taksës së naftës do të kishte disa disavantazhe: do të përfitonin të gjithë pa dallim, do të dobësonte nxitjen për kursim energjie dhe do të krijonte mungesë në të ardhurat buxhetore që do të duhej të kompensohej në mënyra të tjera.

Gersbach sugjeron se masa më efektive do të ishte një mbështetje më e synuar për qytetarët, për shembull përmes rritjes së rimbursimit të CO₂ ose kompensimeve të diferencuara sipas të ardhurave, duke ruajtur njëkohësisht sinjalin e çmimit për kursimin e energjisë.

Në këtë mënyrë, sipas tij, lehtësimi do të ishte më i drejtë dhe më efikas sesa ulja e përgjithshme e taksave mbi karburantet.

Gjenevë: Mbyllet shkolla e vetme për nxënësit në rrezik, vendim që po ngjall polemika

Posted on by Alb

Shkolla e specializuar në Lullin, e vetmja në kantonin e Gjenevës e dedikuar për të rinjtë që kanë braktisur shkollën ose janë në rrezik të braktisjes, do të mbyllet në qershor pas më shumë se dhjetë vitesh funksionimi. Vendimi i autoriteteve kantonale ka shkaktuar reagime të forta nga mësuesit dhe disa parti politike të majta dhe të qendrës.

Mbështetje për të rinjtë në rrezik

Shkolla e Lullin kishte për qëllim të ndihmonte shpejt riintegrimin e nxënësve në sistemin arsimor. Ajo pranonte nxënës të nivelit të mesëm (15–19 vjeç) në çdo kohë dhe ofronte masa të specializuara mbështetëse për një periudhë tre mujore.

Vendimi i autoriteteve

Shteti i Gjenevës planifikon ta decentralizojë këtë sistem duke i shpërndarë ekipet mbështetëse në shkollat e zakonshme. Sipas autoriteteve, reforma e re e “pre-kualifikimit”, që hyn në fuqi këtë verë, do të mbulojë gjithashtu nevojat e këtyre nxënësve.

Kritika nga mësuesit dhe opozita

Ky argument kundërshtohet nga Sindikata e Mësuesve të Arsimit të Mesëm, e cila thekson se shkolla ka rezultate të dëshmuara pozitive. Përfaqësuesja e saj, Emilie Wieland, shpreh shqetësim të veçantë për nxënësit që vuajnë nga “fobia e shkollës”.

Sipas saj, mesazhi që u jepet këtyre të rinjve është kontradiktor: “u thuhet se nuk mund të vijnë më në një shkollë të tillë, por nga ana tjetër të vijnë në shkollë për një program që supozohet t’i ndihmojë të rikthehen në sistem”.

Ajo shton se aktualisht nuk ka qartësi mbi planin e Departamentit të Arsimit Publik (DIP), duke ngritur dyshime nëse zgjidhja e re do të jetë e përshtatshme për këtë kategori nxënësish.

Reagime politike

Edhe në planin politik, partitë e majta dhe të qendrës kërkojnë vazhdimin e këtij shërbimi të specializuar. Parlamenti kantonal ka miratuar një rezolutë urgjente që i kërkon Këshillit Shtetëror të Gjenevës të rishqyrtojë vendimin.

Gjeopolitika globale dhe ekonomia kërcënojnë industrinë zvicerane të orëve

Posted on by Alb

Ndërsa panairi prestigjioz i orëve Watches and Wonders hap dyert në Gjenevë, industria zvicerane e orëve përballet me një kontekst të ndërlikuar global, ku tensionet gjeopolitike dhe pasiguritë ekonomike pritet të dominojnë diskutimet.

Në një intervistë për emisionin e mëngjesit “La Matinale”, eksperti i orëve Olivier R. Müller e cilësoi situatën aktuale si një krizë “veçanërisht të mprehtë”.

Faktorë të shumtë negativë

Sipas Müller-it, sektori po përballet me një kombinim faktorësh të pafavorshëm: forcimi i frangës zvicerane, rritja e ndjeshme e çmimit të arit dhe tensionet gjeopolitike.

“Po shohim një grumbullim faktorësh negativë, të cilët po rëndojnë mbi problemet strukturore ekzistuese”, thekson ai.

Lufta në Lindjen e Mesme konsiderohet një tjetër goditje e fortë për industrinë, duke u shtuar vështirësive në tregun kinez, i cili tashmë është në rënie. Sipas tij, rajoni i Lindjes së Mesme është pothuajse i paralizuar ekonomikisht, me disa përjashtime që gjithashtu janë prekur rëndë, transmeton albinfo.ch.

Rëndësia e tregut të Lindjes së Mesme

Presidenti i Federatës Zvicerane të Orëve, Yves Bugmann, nënvizon rëndësinë e këtij rajoni, i cili përthith rreth 10% të eksporteve zvicerane të orëve. Ai shton se turizmi në këtë zonë është gjithashtu një faktor kyç për industrinë.

Sipas të dhënave:

Emiratet e Bashkuara Arabe janë tregu i tetë më i madh,

Arabia Saudite renditet e 15-ta,

Katari në vendin e 21-të.

Frika nga ndikimi në SHBA

Përtej rënies së eksporteve, Müller paralajmëron për ndikime të mundshme në ekonominë amerikane, e cila aktualisht mbetet shtylla kryesore e mbijetesës së sektorit.

“Nëse stagflacioni (inflacion i lartë i kombinuar me stagnim ekonomik) prek SHBA-në, situata do të përkeqësohet ndjeshëm”, thotë ai.

Pasiguri për tarifat doganore

Një tjetër shqetësim madhor mbetet mungesa e qartësisë për tarifat doganore amerikane. Sipas Müller-it, vonesat në arritjen e marrëveshjeve dhe paqëndrueshmëria politike krijojnë një klimë të dëmshme për biznesin.

“Jetojmë në pasiguri – dhe kjo është helm për çdo biznes”, deklaron ai, duke shtuar se mbetet e paqartë nëse administrata amerikane do të ndryshojë kurs apo do të vendosë masa të reja ndëshkuese.

Rreziku për vendet e punës

Situata ekonomike po ndikon edhe në tregun e punës. Müller paralajmëron se sektori ka “një shpatë të Damokleut mbi kokë”.

Ai thekson rëndësinë e masave si reduktimi i orarit të punës (RHT), të cilat aktualisht po ndihmojnë industrinë të përballojë krizën. Megjithatë, këto masa duhet të rinovohen nga qeveria zvicerane deri më 31 korrik.

“Nëse vazhdojnë, do t’i japin sektorit pak frymëmarrje. Në të kundërt, mund të ketë pasoja serioze për punësimin, veçanërisht në nënkontraktim”, paralajmëron ai.

Sipas Bugmann, aktualisht një në katër kompani në sektorin e nënkontraktimit përfiton nga këto masa.

Megjithatë, Müller thekson se këto duhet të mbeten zgjidhje afatshkurtra dhe jo mbështetje e përhershme për vende pune.

Shpresa mes pasigurive

Pavarësisht sfidave, ka edhe arsye për optimizëm. Müller vëren se industria ka rifituar interesin e brezit të ri, veçanërisht të Gjeneratës Z.

“Të rinjtë po rikthehen drejt botës tradicionale të orëve, ndërsa industria po tregon inovacion të madh – me produkte të reja, materiale dhe dizajne të shumta”, shprehet ai.

Një tjetër faktor pozitiv është fakti që etiketa “Swiss Made” vazhdon të tërheqë interes, ndërsa shitjet në SHBA nuk kanë pësuar rënie drastike, pavarësisht tarifave.

Shtëpi të mëdha, pak banorë: Zvicra kërkon t’i lëvizë “baby boomers”

Posted on by BR

Qeveria zvicerane po shqyrton mënyra për të nxitur gjeneratën “baby boomers” të zhvendoset nga shtëpitë e mëdha, në një përpjekje për të lehtësuar krizën e banesave në vend.

Sipas të dhënave, rreth 300 mijë shtëpi njëfamiljare në Zvicër janë të nënshfrytëzuara, kryesisht të banuara nga persona të moshuar që jetojnë vetëm ose në çifte, edhe pse hapësira është shumë më e madhe se nevojat e tyre .

Megjithatë, statistikat tregojnë se kjo kategori e popullsisë rrallëherë vendos të zhvendoset: norma e lëvizjes për pronarët në moshë pensioni është vetëm rreth 1.5%, ndërsa shumë prej tyre largohen nga shtëpitë vetëm pas moshës 85-vjeçare, transmeton albinfo.ch.

Për këtë arsye, autoritetet federale planifikojnë një studim kombëtar për të analizuar potencialin e këtyre zonave dhe për të gjetur mënyra më efikase për përdorimin e hapësirave ekzistuese. Qëllimi është që këto prona të mund të shfrytëzohen më mirë, sidomos nga familjet që përballen me mungesë banesash .

Megjithatë, qeveria nuk pritet të ndërhyjë me masa të detyrueshme. Në vend të kësaj, po shqyrtohen stimuj vullnetarë, si ndarja e shtëpive në njësi më të vogla apo krijimi i kushteve më të përshtatshme për të moshuarit që të zhvendosen.

Ekspertët theksojnë se një zhvendosje më e madhe e kësaj grupmoshe do të ndihmonte në shpërndarjen më efikase të banesave, duke rritur ndjeshëm disponueshmërinë për familjet e reja.

Në një kohë kur mungesa e banesave po bëhet gjithnjë e më problematike në Zvicër, kjo çështje pritet të mbetet në qendër të debatit publik, mes nevojës për politika të reja dhe respektimit të pronës private.

Gjeneva vendos “frena” për Airbnb: Masa të reja për të mbrojtur banesat

Posted on by BR

Autoritetet në Gjenevë po planifikojnë të forcojnë kontrollin mbi qiratë afatshkurtra përmes platformave si Airbnb, në një përpjekje për të adresuar mungesën e banesave në qytet.

Masat e reja synojnë të kufizojnë përdorimin e apartamenteve për qëllime turistike, pasi rritja e këtij lloji të qirave konsiderohet si një faktor që po redukton ofertën për banorët lokalë, transmeton albinfo.ch.

Gjeneva tashmë ka ndër rregulloret më të rrepta në Zvicër për qiratë afatshkurtra, përfshirë kufizime në numrin e ditëve që një pronë mund të jepet me qira pa leje të veçantë.

Ekspertët theksojnë se presioni mbi tregun e banesave është rritur ndjeshëm vitet e fundit, duke shtyrë autoritetet lokale të ndërmarrin hapa më të ashpër për të mbrojtur hapësirën e banimit për rezidentët. Në shumë qytete zvicerane dhe evropiane, Airbnb është bërë një çështje e debatit publik për shkak të ndikimit në çmimet e qirave dhe disponueshmërinë e banesave.

Me këto masa, Gjeneva synon të vendosë një ekuilibër mes turizmit dhe nevojës për strehim, duke garantuar që banesat të mos përdoren kryesisht për qëllime komerciale në dëm të banorëve lokalë.

Pse qeveria zvicerane nuk po ndërhyn për çmimet e larta të karburantit?

Posted on by BR

Çmimet e benzinës dhe naftës janë rritur ndjeshëm javët e fundit, kryesisht për shkak të zhvillimeve ndërkombëtare dhe rritjes së çmimit të naftës në tregjet globale. Në disa raste, rritja ka qenë mbi 10% për benzinën dhe deri në 20–25% për naftën, duke reflektuar tensionet gjeopolitike dhe ndërprerjet në furnizim, shkruan The Local, transmeton albinfo.ch.

Megjithatë, ndryshe nga vendet si Gjermania apo Austria që kanë ndërhyrë me ulje taksash apo masa lehtësuese, autoritetet zvicerane nuk kanë ndërmarrë hapa të tillë. Arsyeja kryesore lidhet me filozofinë ekonomike të vendit, e cila favorizon tregun e lirë dhe shmang ndërhyrjet direkte në çmime.

Ekspertët theksojnë se në Zvicër çmimet e karburantit ndikohen më shumë nga faktorët globalë sesa nga politika e brendshme, prandaj ndërhyrjet e qeverisë do të kishin efekt të kufizuar. Për më tepër, sistemi tatimor dhe struktura e tregut bëjnë që çmimet të jenë relativisht më stabile krahasuar me vendet e Bashkimit Evropian.

Një tjetër arsye është se inflacioni në Zvicër mbetet relativisht i ulët, edhe pse është rritur së fundmi për shkak të energjisë dhe karburanteve. Autoritetet nuk shohin nevojë për masa urgjente, pasi ndikimi në ekonominë e përgjithshme konsiderohet i moderuar

Ndërkohë, qytetarët përballen me kosto më të larta në pompë, ndërsa ekspertët paralajmërojnë se çmimet mund të mbeten të larta edhe për një periudhë, për shkak të pasigurive në tregjet ndërkombëtare të energjisë.

Në këtë kontekst, qasja e Zvicrës mbetet e kujdesshme: më pak ndërhyrje direkte dhe më shumë besim në stabilitetin e tregut, ndonëse kjo nënkupton që konsumatorët duhet të përballen vetë me rritjen e çmimeve në afat të shkurtër.

Evropa rrezikon mungesë të karburantit për avionë në të ardhmen e afërt

Posted on by BR

Sipas raportimeve, rritja e kërkesës për fluturime, së bashku me kufizimet në prodhim dhe tranzicionin drejt karburanteve më të qëndrueshme, po krijojnë presion mbi furnizimin me karburant për avionë (jet fuel).

Një faktor kyç është kalimi gradual drejt karburanteve të qëndrueshme të aviacionit (SAF), të cilat synojnë reduktimin e emetimeve të karbonit. Megjithatë, prodhimi i këtyre karburanteve mbetet ende i kufizuar dhe nuk arrin të përmbushë kërkesën në rritje, shkruan The Local, transmeton albinfo.ch.

Ekspertët paralajmërojnë se kjo situatë mund të çojë në rritje të çmimeve të biletave dhe në kufizime të mundshme të fluturimeve, sidomos gjatë sezonit të ngarkuar të verës.

Në të njëjtën kohë, infrastruktura aktuale e furnizimit dhe rafinimit në Evropë po përballet me sfida, përfshirë mbylljen e disa rafinerive dhe ndryshimet në zinxhirët globalë të furnizimit.

Industria e aviacionit po kërkon masa urgjente për të siguruar stabilitet në furnizim, ndërsa autoritetet evropiane po përpiqen të balancojnë objektivat klimatike me nevojat ekonomike dhe të transportit.

Nëse nuk gjenden zgjidhje afatshkurtra, ekspertët paralajmërojnë se Evropa mund të përballet me një periudhë të pasigurt për udhëtimet ajrore dhe industrinë e fluturimeve.

Pagat “dalin në dritë”: Rregullat e reja që po ndryshojnë tregun e punës në Evropë

Posted on by BR

Sipas direktivës së Bashkimit Evropian, që duhet të zbatohet deri më 7 qershor 2026, punëdhënësit do të detyrohen të bëjnë më transparente strukturat e pagave, duke përfshirë publikimin e intervaleve të pagave për pozitat e punës dhe shpjegimin e mënyrës se si përcaktohen ato, shkruan The Local, transmeton albinfo.ch.

Një nga ndryshimet më të rëndësishme është se kompanitë nuk do të mund të kërkojnë më nga kandidatët informacion për pagën e tyre aktuale apo të mëparshme, duke synuar të ndërpritet cikli i pabarazive të trashëguara në paga.

Po ashtu, punonjësit do të kenë të drejtë të kërkojnë informacion mbi pagën e tyre dhe ta krahasojnë atë me kolegët që bëjnë punë të njëjtë ose të barasvlershme, duke rritur presionin ndaj kompanive për të justifikuar çdo diferencë.

Rregullat e reja do të prekin edhe kompanitë e mëdha, të cilat do të detyrohen të raportojnë rregullisht për hendekun gjinor në paga. Në rast se diferenca kalon 5% dhe nuk justifikohet, ato duhet të ndërmarrin masa konkrete për ta korrigjuar.

Ekspertët vlerësojnë se këto ndryshime do të transformojnë procesin e rekrutimit, duke e bërë atë më transparent dhe më konkurrues, ndërsa kandidatët do të kenë më shumë informacion dhe fuqi negocimi që në fillim.

Në të njëjtën kohë, kompanitë do të përballen me presion më të madh për të ndërtuar sisteme të drejta dhe të dokumentuara pagash, pasi mosrespektimi i rregullave mund të sjellë pasoja ligjore dhe financiare.

Në përgjithësi, direktiva e re shihet si një hap i rëndësishëm drejt një tregu pune më të drejtë dhe transparent në Evropë, ku paga për punë të barabartë synohet të bëhet standard dhe jo përjashtim.

Rexhepi: Diaspora luan rol të shumëfishtë në ruajtjen e identitetit kombëtar

Posted on by BR

Kryetari i Këshillit Kombëtar Shqiptar në Luginën e Preshevës, Enkel Rexhepi, deklaroi në Samitin IV të Diasporës se diaspora shqiptare përbën një “forcë jetike kombëtare”, ndërsa ngriti shqetësime serioze për gjendjen e shqiptarëve në Luginën e Preshevës.

Në fjalën e tij në panelin “Diaspora dhe demokracia përfaqësuese në hapësirën shqiptare: nga vota te përfaqësimi institucional”, Rexhepi theksoi se diaspora luan rol të shumëfishtë në ruajtjen e identitetit kombëtar, zhvillimin ekonomik dhe përfaqësimin ndërkombëtar të shqiptarëve, transmeton albinfo.ch.

“Diaspora është pjesë jetike e kombit tonë. Ajo ruan identitetin, gjuhën dhe lidhjet me atdheun edhe larg kufijve. Është forcë ekonomike, sociale dhe një urë lidhëse me botën”, u shpreh ai.

Rexhepi theksoi se për shqiptarët e Luginës së Preshevës diaspora ka edhe një dimension më të thellë, duke e cilësuar atë si mbështetje dhe shpresë për të ardhmen.

Sipas tij, shqiptarët e Luginës së Preshevës përballen me sfida të shumta që lidhen me të drejtat themelore dhe përfaqësimin institucional. Një nga çështjet kryesore të ngritura nga Rexhepi ishte pasivizimi i adresave, të cilin ai e cilësoi si një praktikë administrative që, sipas tij, po ndikon në zvogëlimin e pranisë së shqiptarëve në regjistrat shtetërorë.

“Pasivizimi i adresave po i privon shqiptarët nga të drejtat bazë, nga vota te prona dhe qasja në shërbime publike. Kjo është një çështje që kërkon trajtim urgjent institucional”, deklaroi ai.

Rexhepi ngriti gjithashtu shqetësimin për mosnjohjen e diplomave, duke e cilësuar këtë si një pengesë serioze për zhvillimin e të rinjve në Luginë. “Një i ri që diplomohet përballet me realitet të padrejtë, sepse diploma e tij nuk njihet. Kjo nuk është çështje teknike, por një formë përjashtimi që prek të ardhmen e një brezi të tërë”, u shpreh ai.

Duke folur për situatën ekonomike, Rexhepi tha se papunësia dhe kushtet e vështira ekonomike po ndikojnë në shpërnguljen e vazhdueshme të shqiptarëve nga Lugina e Preshevës.

Ai ngriti gjithashtu çështjen e marrëveshjeve të nënshkruara mes përfaqësuesve shqiptarë dhe institucioneve të Serbisë, duke theksuar se ato nuk janë zbatuar në praktikë. “Nuk është zbatuar asnjë nga marrëveshjet e nënshkruara, pavarësisht pranisë së faktorit ndërkombëtar. Kjo ka bllokuar mbështetjen për bujqësinë dhe arsimin”, theksoi Rexhepi.

Në përmbyllje të fjalës së tij, ai bëri thirrje për angazhim më të madh të diasporës dhe institucioneve shqiptare në mbrojtje të të drejtave të shqiptarëve në rajon.

“Mbajeni në zemër Luginën e Preshevës dhe Sanxhakun në çdo vendimmarrje. Por duhet të jemi të qartë: ruajtja e identitetit nuk zëvendëson garantimin e të drejtave të njeriut. Prandaj kërkojmë ndalimin e pasivizimit të adresave, njohje të diplomave, mbështetje të barabartë ekonomike dhe zbatim të marrëveshjeve”, deklaroi Rexhepi.

NATO-ja refuzon të përfshihet në bllokimin e Ngushticës së Hormuzit

Posted on by Drin Reçica

Aleatët e NATO-s kanë deklaruar të hënën se nuk do të përfshihen në planin e presidentit amerikan Donald Trump për të bllokuar Ngushticën e Hormuzit, duke propozuar që ndërhyrja të bëhet vetëm pas përfundimit të luftimeve, përcjell albinfo.ch.

Ky qëndrim i vendeve aleate pritet të rrisë tensionet brenda aleancës dhe të shkaktojë pakënaqësi në Uashington, në një periudhë kur marrëdhëniet mes Trumpit dhe disa shteteve europiane kanë qenë të tensionuara.

Trump ka deklaruar se ushtria amerikane do të bashkëpunojë me vende të tjera për të ndaluar trafikun detar në këtë rrugë ujore strategjike, pas dështimit të bisedimeve të fundjavës për arritjen e një marrëveshjeje që do t’i jepte fund konfliktit gjashtëjavor me Iranin.

Më pas, ushtria amerikane ka sqaruar se bllokada, e cila ka nisur në orën 16:00 me kohë të Kosovës, do të zbatohet vetëm për anijet që shkojnë drejt ose kthehen nga portet iraniane.

Që nga nisja e luftës më 28 shkurt, Irani ka bllokuar pjesërisht ngushticën për shumicën e anijeve, duke lejuar kryesisht vetëm lëvizjen e mjeteve të veta detare. Teherani ka kërkuar që kontrolli mbi këtë rrugë ujore të bëhet i përhershëm, madje duke lënë të hapur mundësinë për vendosjen e taksave ndaj anijeve që e përdorin atë.

“Bllokada do të fillojë së shpejti. Vende të tjera do të përfshihen në këtë bllokadë”, ka shkruar Trump të dielën në Truth Social.

Megjithatë, aleatët e NATO-s, përfshirë Britaninë e Madhe dhe Francën, kanë refuzuar të marrin pjesë në këtë veprim, duke deklaruar se po punojnë për një iniciativë që synon të mbajë të hapur rrugën ujore, ku normalisht kalon rreth një e pesta e furnizimeve globale me naftë.

Refuzimi i aleatëve shihet si një tjetër pikë përplasjeje me Trumpin, i cili më herët ka kërcënuar me tërheqje nga NATO dhe po shqyrton mundësinë e reduktimit të trupave amerikane në Evropë. Situata është komplikuar edhe më shumë pasi disa vende europiane kanë refuzuar t’u lejojnë avionëve ushtarakë amerikanë përdorimin e hapësirës ajrore për sulme ndaj Iranit./Albinfo.ch.

Thirrjet telefonike të padëshiruara nga kompanitë e sigurimeve vazhdojnë në Zvicër, pavarësisht ndalimit

Posted on by Drin Reçica

Pavarësisht se që nga 1 shtatori 2024 në Zvicër është në fuqi ndalimi i thirrjeve telefonike të pakërkuara nga kompanitë e sigurimeve shëndetësore, kjo praktikë vazhdon të raportohet nga qytetarët, përcjell albinfo.ch.

Autoriteti zviceran i mbikëqyrjes së tregut financiar FINMA, i cili është përgjegjës për rregullimin e veprimtarisë së siguruesve shëndetësorë, ka bërë të ditur se shkeljet nuk janë ndalur plotësisht.

“Vazhdojmë të marrim rregullisht raportime për shkelje të kësaj rregulloreje,” deklaroi zëdhënësja e FINMA-s, Ursula Keel.

Sipas autoriteteve, një nga arsyet e mosrespektimit të ndalimit mund të jetë fakti se deri më tani nuk janë vendosur gjoba ndaj shkelësve, gjë që mund të ketë ndikuar në vazhdimin e kësaj praktike./Albinfo.ch

Komisioni miraton pjesëmarrjen e FSK-së në mision ndërkombëtar në Gaza

Posted on by Drin Reçica

Komisioni për Çështje të Sigurisë dhe Mbrojtjes ka miratuar unanimisht vendimin e Qeverisë së Kosovës për dërgimin e Forcës së Sigurisë së Kosovës (FSK) jashtë vendit, në kuadër të pjesëmarrjes në Forcën Ndërkombëtare Stabilizuese në Gaza, me misione humanitare dhe të sigurisë, përcjell albinfo.ch.

Deputetja e Partisë Demokratike të Kosovës, Ganimete Musliu, e ka vlerësuar këtë vendim si dëshmi të pjekurisë institucionale të Kosovës dhe të profesionalizmit të FSK-së. Sipas saj, pjesëmarrja në misione ndërkombëtare tregon besimin që është ndërtuar në kapacitetet mbrojtëse të vendit dhe gatishmërinë e FSK-së për të marrë përgjegjësi jashtë kufijve shtetërorë.

Edhe deputetja e Lëvizjes Vetëvendosje, Shqipe Selimi, theksoi se FSK-ja është e gatshme të kontribuojë në misione paqeruajtëse së bashku me aleatët ndërkombëtarë, duke vlerësuar se institucionet e Kosovës duhet të vazhdojnë mbështetjen ligjore, financiare dhe logjistike për forcat e saj të sigurisë.

Ndërkohë, deputeti i Lidhjes Demokratike të Kosovës, Fadil Hadergjonaj, e cilësoi këtë zhvillim si lajm pozitiv për Kosovën dhe për FSK-në, duke kërkuar që pjesëtarëve të saj në mision t’u sigurohet mbështetje e plotë në aspektin e pajisjeve dhe logjistikës.

Pjesëmarrja e FSK-së në këtë mision vlerësohet si një hap i rëndësishëm drejt angazhimit më të madh të Kosovës në operacione ndërkombëtare të paqes dhe sigurisë./Albinfo.ch

Të huajt rezidentë po shndërrojnë zonat e Cyrihut në lagje luksoze

Posted on by Drin Reçica

Disa nga zonat përreth Liqeni i Cyrihut po përjetojnë një transformim të shpejtë, duke u kthyer në lagje gjithnjë e më luksoze të dominuara nga blerës të huaj rezidentë, përcjell albinfo.ch.

E ashtuquajtura “Gold Coast”, e vendosur në bregun lindor të Cyrih, ka qenë prej vitesh një destinacion i preferuar për të pasurit e huaj. Megjithatë, tani ajo po përballet me konkurrencë të fortë nga “Platinum Coast”, e cila shtrihet në anën perëndimore të liqenit.

Ndërsa më parë konsiderohej më pak e zhvilluar, “Platinum Coast” ka arritur ta tejkalojë “Gold Coast” në tregun e pasurive të paluajtshme. Në komunat si Kilchberg dhe Horgen, çmimet për metër katror kanë arritur deri në 35,000 franga, ndërsa në “Gold Coast” ato qëndrojnë rreth 30,000 franga.

Sipas të dhënave, kjo zonë e re luksoze po tërheq gjithnjë e më shumë ekspatë, të cilët në disa pjesë tashmë janë më të shumtë në numër se banorët vendas zviceranë./Albinfo.ch