Arrestohet maqedonasi që tërhoqi zvarrë Ziadin Selën

Punonjësit shqiptarë në Sektorin e Punëve të Brendshme në Kumanovë ka dy ditë që kanë identifikuar Toni Trajkovskin si njërin nga katër personat që kanë rrahur rëndë deputetin shqiptar, Ziadin Sela

Inspektorët shqiptarë të Policisë në Kumanovë kanë arrestuar Toni Trajkovskin, maqedonasin që sulmoi dhe tërhoqi zvarrë deputetin Ziadin Sela në Kuvendin e  Maqedonisë. Ai është arrestuar në Kumanovë, derisa po hynte në një restorant, ndërsa njohët si mbështetës i zjarrtë i partisë së ish kryeministrit Nikolla Gruevski, VMRO DPMNE.

Gazeta Koha merr vesh se punonjësit shqiptarë në Sektorin e Punëve të Brendshme në Kumanovë ka dy ditë që kanë identifikuar Trajkovskin si njërin nga katër personat që kanë rrahur rëndë deputetin Ziadin Sela, përfaqësuesin e Aleancë për Shqiptarët, megjithëse i njëjti nuk ishte i kapshëm nga policia.

Rreth orës 21, Trajkovski është parë duke u futur në një restorant në qytet, ku edhe është ndeshur me inspektorët shqiptarë. Megjithatë, përkundër identifikimit të sigurt, punonjës maqedonas të stacionit policor në Kumanovë janë munduar që ta vënë në dyshim pjesëmarrjen e Trajkovskit në sulmin ndaj Selës.

Nga ana tjetër, siç thonë zyrtarë të policisë, këmbëngulës kanë qenë policët shqiptarë, të cilët nuk kanë lejuar lirimin e Trajkovskit, ndërsa të njëjtin e kanë mbyllur në paraburgim 24 orësh, derisa nesër në mëngjes, ai do ta nisin drejt Shkupit, për t’u përballu me drejtësinë.

Toni Trajkovski në videon e shkurtër kur sulmohet Sela është i moshuari tullac me mjekër të bardhë. Ai kishte kapur zvarrë Selën duke e nxjerr nga salla, të alivanosur.

Sela, një javë pas sulmit barbarë në Kuvend, është në regjim shtëpiak të kurimit, ndërsa bashkëpunëtorët e tij thonë se ai është në gjendje të mirë shëndetësore dhe së shpejti pritet t’i kthehet aktiviteteve politike.