Tensione në Kuvendin e Kosovës: Sërish gaz lotsjellës

Sipas mediave që ishin prezent në sallë, kësaj here gazin e kanë hedhur deputetët Haxhi Shala i Partisë Nisma për Kosovën dhe Ismajl Kurteshi i Lëvizjes Vetëvendosje

Kuvendi i Kosovës është kthyer në një arenë përplasjesh ndërmjet koalicionit dhe partive opozitare. Edhe sot, sikurse herëve të kaluara, ende pa nisur mirë seanca plenare, opozita ka hedhur gaz lotsjellës duke pamundësuar vazhdimin e punimeve, ndërsa ka krijuar tensione të reja në Kosovë.

Sipas mediave që ishin prezent në sallë, kësaj here gazin e kanë hedhur deputetët Haxhi Shala i Partisë Nisma për Kosovën dhe Ismajl Kurteshi i Lëvizjes Vetëvendosje. Kjo seancë nisi pa katër deputetët opozitarë, Albin Kurtin e Donika Kadja-Bujupi, që janë në paraburgim dhe Albulena Haxhiu e Taton Topalli që janë në arrati.

Përfaqësuesit e tri partive opozitare, kanë thënë se do të pamundësojnë vazhdimin  punimeve në Kuvend, deri në tërheqjen e nënshkrimeve nga dy marrëveshjet e fundit, atë për Asociacionin e Komunave Serbe dhe për Demarkacionin e Kufirit me Malin e Zi.

Kryetari i Grupit Parlamentar të Lëvizjes Vetëvendosje, Glauk Konjufca, ka deklaruar se opozita nuk do të lejojë mbajtjen e seancave në Kuvend. Konjufca ka thënë se opozita do e pamundësojë mbajtjen e seancave dhe, sipas tij, pushteti ka vetëm një zgjedhje. “Ajo është tërheqja e marrëveshjeve”, ka thënë Konjufca.

Menjëherë pas bllokimi të seancës u mbledh Kryesisë së Kuvendit në një mbledhje të jashtëzakonshme. Kryetari i Kuvendit, Kadri Veseli tha se çështjet janë politike dhe zgjidha duhet të jetë politike. “Opozita po e dëmton vendin dhe vetën. Nuk e ka forcën e as fuqinë që të protestoj jashtë pos Kuvendit. Kuvendi po abuzohet nga pafuqia dhe nga dështimet jashtë Kuvendit”, tha ai.

Deputetja nga radhët e lëvizjes Vetëvendosje, Aida Dërguti, ka thënë se në mbledhjen e Kryesisë ka pasur propozim që opozita të përjashtohet në formë afatgjate. Sipas saj kërkesa është bërë nga kryetarët e Grupeve Parlamentare të PDK-së dhe LDK-së. Ajo ka thënë se kryetarëve të Grupeve Parlamentare të PDK-së dhe LDK-së i është bërë me dije se nuk kanë fuqi të tilla për të marrë vendim për përjashtim të opozitës.

Kreu i AAK-së, Ramush Haradinaj është shprehur se mbajtja e seancës me police e bënë Kosovën një shtet policor. “Mbajtja e seancës me policë e bënë këtë vend shtet policor”, ka thënë Haradinaj. Nuk tha se ku do të mbahet mbledhja e kuvendit, në sallën për këtë dedikim, apo ne një tjetër alternative.

Ndryshe,s seanca tani është ndërprerë por pritet të vazhdoj pas pak në një sallë të improvizuar.