Moti në Zvicër: Deri në 28 gradë, para ardhjes së të ftohtit

Shtatori po mbyllet me temperatura të larta dhe thatësi të jashtëzakonshme, ndërsa nga e enjtja pritet një front i ftohtë me reshje.

Zvicra do t’i përmbyllë ditët e fundit të shtatorit me temperatura deri në 28 gradë, ndërsa nga e enjtja një front i ftohtë do të sjellë ajër më të freskët dhe reshje lokale, transmeton albinfo.ch.

Të martën dhe të mërkurën, në ultësira temperaturat do të lëvizin kryesisht nga 25 deri në 28 gradë, rreth 10 gradë mbi mesataren për fundin e shtatorit. Më pas, temperaturat do të bien në rreth 20 deri në 23 gradë, ndërsa priten edhe rrebeshe shiu dhe erëra më të forta.

Shtatori ka qenë jashtëzakonisht i thatë. Në shumë zona kanë rënë vetëm 10 deri në 20 për qind e reshjeve të zakonshme mujore. Megjithatë, një periudhë më e gjatë me reshje të vazhdueshme nuk pritet për momentin.

Në fundjavë moti pritet të qetësohet, me temperatura rreth 20–21 gradë dhe intervale me diell. Sipas meteorologut Peter Wick, vjeshta po fillon gradualisht të marrë vendin e verës. /Albinfo.ch

---