Serbia mund Shqipërinë me rezultat 2:0

Deri në minutat e lojës shtesë Shqipëria ishte dukshëm më e mirë në fushë, por në momentin kur e kërkoi golin, pësoi dy gola të shpejt në minutat shtesë të lojës

Kombëtarja shqiptare ka pësuar një disfatë në minutat shtesë nga Serbia me rezultat 2:0, duke dalë kokulur nga “Elbasan Arena” ku kanë qenë të pranishëm rreth 13 mijë shikues. Deri në minutat e lojës shtesë Shqipëria ishte dukshëm më e mirë në fushë, por në momentin kur e kërkoi golin, pësoi dy gola të shpejt.

Kjo humbja ia zbeh pak gjasat Shqipërisë për kualifikimet “Francë 2016”, edhe pse Kombëtarja e selektorit Giani de Biazi është akoma në garë, edhe nëse humbë në ndeshjen e radhës kundër Armenisë që luhet të dielën më 11 tetor.

Fillimisht Kolarov në minutën e 90-të zhbllokoi rezultatin, ndërsa, goditjen e fundit skuadrës sonë ua dha Lajiq në minutën e 90+3, duke shënuar golin e dytë. Por që Shqipëria ta ketë të sigurt Evropianin duhet patjetër ta fitojë ndeshjen në udhëtim tek Armenia, që mos të luaj në barazh, ku e presin kombëtaret e forta dhe gjasat janë shumë më të vogla.

Megjithatë, ajo që është e rëndësishme loja është zhvilluar në suaza të “fair play”, pa tensione siç priteshin. Shqipëria me këtë rast është treguar një shtet që respekton kundërshtarët dhe që organizon loja pa urrejtje ndëretnike. Në Beograd, një vit më parë, lojtarët e kombëtares shqiptare ishin sulmuar nga shikuesit.