Ndihma e Lozanës për bibliotekën e Ferizajt

Me një ndihmë prej 5 mijë eurosh që janë dhënë donacion nga Komuna e Llozanës, janë ndërtuar raftet e reja në “këndin e librit francez” në bibliotekën e qytetit në Ferizaj  

Lidhjet kulturore ndërmjet komunës së Lozanës dhe asaj të Ferizajt, po vazhdojnë të forcohen edhe më shumë. Përveç këndit prej rreth 400 librash në gjuhën frënge që erdhën donacion në qershor të këtij viti, komuna zvicerane me ndihmë prej 5 mijë eurosh, ka financuar edhe ndërtimin e rafteve të reja në bibliotekën e qytetit.

Për ndihmën e komunës së Lozanës shprehet falënderues Teuta Demiri, drejtoresh në  bibliotekën e qytetit “Sadik Tafarshiku”.

“Një donacion nga biblioteka e Lozanës kemi marrë 5000 €, dhe si duket aq kanë kushtuar raftet për sektorin për të rritur”, deklaroi Demiri për Albinfo.ch. Ajo tha se në bashkëpunim me bibliotekën e Lozanes, në Ferizaj e kanë formuar këndin e librit në gjuhen frënge.

Pagesa për raftet e reja, sipas saj, ka shkuar përmes Komunës së Ferizajt, nga firma e cila fituar tenderin për pajisjen me inventar të institucioneve.

“Bashkëpunimi me Komunën e Lozanës është korrekt dhe shpresojmë se do vazhdoje ky bashkëpunim edhe në të ardhmen”, deklaroi Demiri, e cila për bashkëpunimin me këtë komunë e ka falënderuar aktivistin dhe bashkatdhetarin Musa Kamenica, i cili ka krijuar lidhjet ndërmjet dy komunave Lozanës dhe Ferizajt.

Siç ka raportuar edhe më herët Albinfo.ch, në kontingjentin e librave të dhuratë nga zyrtarët zviceranë, në qershor të këtij viti, kanë qenë 378 vepra letrare si dhe libra për mësim të gjuhës frënge, 47 stripe, 20 fjalorë, 45 CD dhe 13 DVD.