E lajmëron në Zvicër kush ia vrau babanë në luftë

Telefonuesi në gjuhet serbe i tregon se kush ia ka vrarë babanë gjatë luftës së fundit në Kosovës, ndërsa në fotografinë dërguar në postë, shihet vendi i varrit në Prizren

Një person i panjohur iu kishte lajmëruar në telefon Lulëzim Morinës nga Prizreni, në banesën tij në Zvicër, ndërsa më pas në postën e tij i vijnë edhe dy fotografi, ku shihet një varr. Telefonuesi në gjuhet serbe i tregon se kush ia ka vrarë babanë gjatë luftës së fundit në Kosovës, ndërsa në foto shihet vendi i varrit.

Në fotografi figuronte varri i babait të tij Sali Morina, i cili bashkë me Miftar Morinën, më 23 mars të vitit 1999, ishin kapur nga policia serbe dhe prej asaj kohe konsiderohen të zhdukur.

Bazuar në fotografitë që në postë i shkuan nga një anonim, ai filloi kërkimin e eshtrave të babait në varrezat e myslimanëve në Prizren. Ai ka treguar se si i kanë gjetur këto varre, mirëpo, jo edhe eshtrat e babait të tij.

Si pjesëtar i familjeve të të zhdukurve, shpreh mllefin se përse aq pak u punua për zbardhjen e fatit të të afërmve të tyre, transmeton Koha.net.

Njëri prej varreve të cilin e gjeti Lulëzimi, ishte hapur edhe në kohën e UNMIK-ut. Por, sipas drejtorit të Departamentit të Mjekësisë Ligjore, Arsim Gërxhaliu, në këtë lokacion janë gjetur edhe eshtrat e mbi 200 personave të tjerë, gjë që e bënte të pamundur gjetjen e tij.

Ndërkaq, i apostrofuari për vrasjen e babait të tij përmendet Goran Radisavleviq, i njohur si komandant “Guri”, i cili ka komanduar njësitet më famëkeqe serbe në Kosovë. Ai dyshohet edhe për vrasjen e vëllezërve Bytyçi, ndërsa në një emision të BBC-së, ka pranuar se ka komanduar njësitete policore dhe ushtarake serbe në Drenicë me 5-6 dhe 7 mars kur është vrarë Adem Jashari dhe familja e tij.