Bie numri i familjeve me asistencë sociale

Numri i familjeve që marrin ndihmë sociale këtë vit është 26 947, ose 2 825 familje më pak se në vitin 2014

Foto ilustrim

Numri i familjeve me asistencë sociale ka shënuar rënie në Kosovë për 9.5 për qind, krahasuar me të njëjtën periudhë të vitit 2014, ndërsa numri i pensionistëve ka shënuar rritje. Kështu thuhet në statistikat e fundit që publikoi Agjencia e Statistikave të Kosovës (ASK), lidhur me mirëqenies sociale për tremujorin e dytë (TM2) të vitit 2015.

Ky publikim ofron të dhëna për skemën e ndihmës sociale, skemat  e pensioneve bazë, pensioneve kontribut-pagues, pensioneve për personat me aftësi të kufizuara, skemën e pensioneve të familjeve të dëshmorëve dhe invalidëve të luftës, të dhëna për numrin e fëmijëve të braktisur, të dhëna për shtëpitë për personat e moshuar dhe papërkujdesje  familjare etj.

Sipas rezultateve të dala nga ky publikim rezulton se numri i familjeve, të cilat kanë përfituar ndihmë sociale në TM2 2015 ka qenë 26 947, me gjithsej 112 563 anëtarë.
Krahasuar me TM2 2014, numri i familjeve që kanë përfituar ndihmë sociale ka shënuar rënie për 2 825 familje ose shprehur në përqindje 9.5 për qind.

“Numri i përfituesve nga pensionet bazë të moshës në TM2 të viti 2015 ishte 128 190. Krahasuar me TM2 2014, numri i përfituesve nga pensionet bazë të moshës është më i madh për 8 663 ose shprehur në përqindje 7.2 për qind”, thuhet në statistikat e ASK-së, publikuar të premten, raporton albinfo.ch.

Ndërkaq numri i përfituesve nga pensionet kontribut-pagues të moshës në TM2 2015 ishte 39 047. Krahasuar me TM2 2014, numri i përfituesve nga pensionet kontributpaguese të moshës është më i madh për 1 711 ose shprehur në përqindje 4.6 për qind.

“Numri i fëmijëve të braktisur në TM2 2015 ishte 7. Krahasuar me TM2 2014, numri i fëmijëve të braktisur është më i vogël për 4 ose shprehur në përqindje 36.3 për qind’, thuhet në raport.