Klerikët fetarë kërkojnë anëtarësimin e Kosovës në UNESCO

Në një letër të përbashkët, klerikët fetarë të Kosovës, kërkojnë nga drejtoresha e Përgjithshme e UNESCO-s, Irina Bokova që Kosova të bëhet anëtare e saj

Përfaqësuesit e të gjitha komenteve fetare në Kosovë janë bashkuar për anëtarësimin e Republikës së Kosovës në Organizatën e Kombeve të Bashkuara për Arsimin, Shkencën e Kulturën (UNESCO). Ata kërkojnë nga Organizata e Kombeve të Bashkuara, që Kosova të pranohet në këtë organizate.

Në një letër të përbashkët, ata ia kanë shkruar drejtoreshës së Përgjithshme të UNESCO-s, Irina Bokova, sekretarit të Përgjithshëm të OKB-së, Ban Ki-moon, dhe delegacioneve të vendeve anëtare të UNESCO-s.

Letrën e kanë nënshkruar myftiu Naim Tërnava, kryetar i Bashkësisë Islame të Kosovës, Don Lush Gjergji, vikar i Përgjithshëm i Kishës katolike në Kosovë, pastori Driton Krasniqi, kryetar i Kishës Protestante Ungjillore të Kosovës, sheh Lulzim Shehu, Bashkësia e Sufi Tarikateve të Kosovës, baba Mumin Lama, kryetar i Komunitetit Bektashian në Kosovë, dhe Votim Demiri, kryetar i Bashkësisë Hebraike në Kosovë.

“Ne po ju drejtohemi në emër të shumicës dërrmuese të të gjitha bashkësive fetare në Kosovë, që përfaqësojnë 96 për qind të të gjithë popullsisë së Kosovës. Luteni ta konsideroni këtë letër si një argument shtesë për mbështetjen tuaj dhe anëtarësimit të Kosovës në UNESCO”, thuhet në letër.

Kosova ka qenë gjithmonë në udhëkryq të qytetërimeve, perandorive dhe feve, thuhetnë vazhdim të letrës.

“Edhe sot, edhe pse pjesa më e madhe banorëve e konsiderojnë veten myslimanë sunit, prania e fuqishme historike bashkësive krishtere ortodokse, katolike, myslimane bektashiane, sufi myslimane, protestante ungjillore dhe hebraike, dhe bashkësitë e tjera, pasurojnë vendin tonë ton të përbashkët që ne e quajmë Kosovë. Ne konsiderojmë se jemi vërtetë të bekuar me këtë thesar”, thuhet në letrën e përbashkët.

Klerikët thonë se e përqafojmë harmoninë dhe bashkëpunim historik ndërfetar, megjithëse një luftë e egër shkatërroi vendit vetëm 16 vite më parë.

“Kosova është vendi ku një vajzë e re me emrin Gonxhe Bojaxhiu u zotua për herë të pare për t’u bërë Nënë Tereza e të gjithë njerëzimit dhe ku familjet fisnike shqiptare myslimane i fshehën hebrenjtë për t’i shpëtuar nga Shoah apo Holokausti”, shkruana klerikët fetarë.

Një pjesë e madhe e trashëgimisë së përbashkët, sipas tyre, është humbur përgjatë historisë, posaçërisht në dekadat e fundit.

“Shtëpitë e Perëndisë duhet të mbeten të paprekura që të shërbejnë si fanarë për brezat e ardhshëm. Kufijtë dhe perandoritë vijnë dhe shkojnë, por vendet e adhurimit e të gjithë njerëzve duhet të mbeten të paprekur. Në epokën që po jetojmë, bashkësitë fetare të Kosovës kanë dhënë një kontribut të madh për të ndërtuan një shoqëri paqësore dhe tolerante ku ne mund të bashkëjetojmë dhe të mbështesim njëri-tjetrin, pavarësisht nga përkatësia jonë etnike apo fetare”, thonë ata.

Klerikët në letër thonë se mbesin me shpresë se do të bëhet çka është e mundur për të mbështetur anëtarësimin e Kosovës në UNESCO.

“Lënia e qytetarëve tonë të izoluar dhe pa qasje të drejtpërdrejtë në UNESCO nuk do të ndihmojë kauzën e mbrojtjes së trashëgimisë sonë të përbashkët, promovimin e dialogut ndërfetar dhe qasjen gjithëpërfshirëse ndaj të gjithë njerëzve që përqafojnë paqen anembanë botës. Ju gjithashtu duhet të keni parasysh se popullsia e Kosovës është shumë e re dhe ka nevojë për arsim të mirë, qasje në shkencë dhe e lidhje me kulturën botërore”, thuhet në letrën e përbashkët.