Veteranët e gjuajnë me shishe Hashim Thaçin

Thaçi deri sa po hynte në objektin e Qeverisë nga godina e Kuvendit të Kosovës u atakua nga veteranët e luftës dhe u quajt hajn. Ai i gjuajt edhe me shishe

Dikur njihej si ikona e UÇK-së (Ushtrisë Çlirimtare të Kosovës) si njeriu që drejtoi politikisht një proces të rëndësishëm të luftë dhe paqe. Mirëpo sot ish kryeministri i Kosovës dhe lideri i partisë më të madhe politike në Kosovë (PDK), Hashim Thaçi u gjuajt me shishe dhe u quajt hajn nga ish bashkëluftëtarët e tij.

Thaçi deri sa po hynte në objektin e Qeverisë nga godina e Kuvendit të Kosovës, ku po diskutohet dhe po pritet të votohet Gjykata Special që targeton ish-guerilët e UÇK-së nën dyshimin për krime lufte, ai u atakua nga veteranët e luftës dhe u quajt hajn. Madje ai i gjuajt edhe me shishe.

Ish guerilët nuk e kanë kursyer as komandantin e UÇK-së dhe TMK-së, Agim Çekun, derisa ky ishte duke hyrë në ndërtesën e Qeverisë. Çeku është edhe kryetar i Komisionit Qeveritar për verifikimin e statusit të veteranëve, një proces i stërzgjatur që nuk po arrinë të marrë epilog.

Ndryshe, dhjetëra veteranë të luftës po protestojnë në sheshin “Skënderbeu” duke kërkuar publikimin e të gjitha listave me emrat e veteranëve të luftës së UÇK-së. Ata kanë thënë se do të protestojnë deri në mbrëmje derisa të publikohen të gjitha listat e veteranëve, invalidëve dhe dëshmorëve të UÇK-së.

Ndryshe, aktualisht në Kuvend për herë të dytë deputetët po debatojnë për themelimin e Gjykatës Speciale e cila do të merret me krimet e supozuara të UÇK-së gjatë vitit 1998-1999 si dhe për periudhën e pasluftës deri më 2000. Kjo Gjykatë Speciale do të hidhet në votim, ndërsa opozita ka deklaruar kundër.

Kundër kësaj Gjykate janë deklaruar edhe disa deputetë të koalicionit qeverisës, ndërsa për kalimin e amendamenteve kushtetuese që i hapin rrugë Gjykatës duhen dy të tretat e votave të të gjithë deputetëve të Kuvendit, 81 nga 120 sa ka Parlamenti i Kosovës.