Admir Mehmeti, lojtar i gjithanshëm

Drejtori sportiv i Bayern Leverkusen, Rudi Völler: "lojtar i shpejtë, teknik, lojtar me dhunti të shumta dhe i gjithanshëm”

Futbollisti shqiptar, Admir Mehmedi, po konsiderohet si shpresa e madhe për ekipin e Bayern Leverkusen. Ish-lojtari i FC Freiburgut, i cili gjatë këtij afati kalimtar kaloi në Bayern Leverkusen po e pret me gëzim fillimin e sezonit të ri për të debutuar me ekipin e ri. “Unë jam këtu, në vendin e duhur për të bërë hapin më të mirë në karrierën time” shprehet sulmuesi shqiptar për “Kicker.de”, përcjell albinfo.ch.

Edhe drejtori sportiv i Bayern Leverkusen, Rudi Völler, e lavdëron transferin e ri, duke e cilësuar si një lojtar të gjithanshëm. “I shpejtë, teknik, lojtar me dhunti të shumta dhe i gjithanshëm”, thotë Völler.

Bashkëlojtari i tij te kombëtarja zvicerane, Josip Dermiç, pas një sezoni jo të mirë u largua nga Leverkusen për të kaluar te Borusia Monchengladbach, por kjo nuk e frikëson Mehmedin. “Atij nuk i ecën mbarë te Leverkusen, por unë jam një lojtar me tipare të tjera”, shprehet futbollisti shqiptar nga Maqedonia.

Mehmedi përshkruhet si një lojtar me tipare të shumta sulmuese. Ai mund të luajë si sulmues i majtë, si mesfushor ofensiv, si sulmues i qendrës, ai është i gjithanshëm. Për këtë më së miri flet fakti që në 60 lojëra të zhvilluara në bundesligën gjermane, ka shënuar 14 gola dhe ka bërë pesë asistime.