Zvicra mbështet liberalizim e vizave për kosovarët

“Zvicra mbështet këtë proces shumë të rëndësishëm i cili është shumë i nevojshëm për qytetarët e Republikës së Kosovës”, tha ambasadorja zvicerane, Krystyna Marty Lang

Autoritetet zvicerane janë të gatshme ta ndihmojnë Republikën e Kosovës në procesin e liberalizimit të vizave, pasi që konsideron se lëvizja e lirë është shumë e nevojshme për kosovarët. Kështu është thënë sot në takimin e radhës lidhur me “partneritetin për migrim” midis Kosovës dhe Zvicrës.

Në këtë takim morën pjesë, ministri kosovar i Punëve të Brendshme, Skender Hyseni, ambasadorja e Zvicrës në Kosove, Krystyna Marty Lang, një delegacion nga Zvicra i kryesuar nga Ambasadori Von Arb, si dhe përfaqësues të MPB-së dhe institucioneve tjera.

Ministri i MPB-së, Skender Hyseni theksoi se të dyja delegacionet do të gjejnë mënyrat më të mira për të mundësuar që lëvizja e qytetarëve të bëhet në kuadër të normave dhe rregullave në fuqi dhe sa më shumë që është e mundur të punohet drejt arritjes së një stadi të lëvizjes së lirë të qytetarëve.

Ai theksoi se tashmë është përfunduar raporti final për liberalizim të vizave dhe i njëjti javën e kaluar është dërguar në Bruksel.

“Në korrik të këtij viti presim një komision vlerësues nga BE-ja, për të evidentuar progresin”, theksoi ministri Hyseni, me ç’rast kërkoi përkrahjen e Zvicrës për Kosovën në rrafshin e liberalizimit të vizave.

Ambasadorja e Zvicrës në Kosove, Krystyna Marty Lang, tha se shteti të cilin e përfaqëson ajo, dëshiron që Kosova të jetë e liberalizuar në kuptim të shfrytëzimit të lëvizjes së lirë të qytetarëve dhe se ky proces duhet të shkojë drejt përmbylljes.

“Zvicra mbështet këtë proces shumë të rëndësishëm i cili është shumë i nevojshëm për qytetarët e Republikës së Kosovës”, tha Lang.

Ndërsa kryesuesi i delegacionit zviceran, Ambasadori Von Arb, theksoi se ka gjetur zhvillime pozitive në Kosovë sa i përket menaxhimit të migrimit dhe integrimit dhe personave të riatdhesuar.

Në këtë takim të radhës, gjithashtu do të diskutohen një numër çështjesh me rëndësi në fushën e migrimit, që kanë për qellim rritjen e bashkëpunimit midis autoriteteve tona dhe atyre zvicerane.