Edmond Kapllani thyen rekord në Bundesliga 2

Edmond Kapllani ka vendosur një rekord të ri në Gjermani. Sulmuesi shqiptar i FSV Frankfurt-it kryeson listën e legjionarëve, të cilët kanë shënuar më shumë gola në Bundesliga 2. Këtë lajm e bën të ditur faqja e njohur sportive gjermane transfermarkt.de, transmeton albinfo.ch.

Sulmuesi i Kombëtares shqiptare shënoi gjatë fitores 3-2 të FSV Frankfurt-it ndaj Fortuna Dusseldorf golat e tij me numër 69 dhe 70 në 195 ndeshje në Bundesliga 2. Ai kaloi Mohamadou Idrissou me 68 gola. Gjatë 195 ndeshjeve, Kapllani ka dhënë edhe 16 asiste.

32-vjeçari i përfaqësues shqiptare shënoi këtë sezon 11 gola në kampionat, duke qenë shënuesi më i mirë i FSV Frankfurt-it, ndërkohë që ka qenë dy herë në formacion ideal të Bundesliga 2: në javën e 23-të dhe 34-t.

Pas Kapllanit, golashënuesi i dytë më i mirë shqiptar në Gjermani, kjo vetëm për Bundesliga 2, është Altin Rraklli, me 42 gola (14 asiste) të realizuara në 171 ndeshje, i cili renditet i 12-i në klasifikimin e përgjithshëm të të gjithë legjionarëve.

Albinfo.ch