Kosovë, edhe tri vjet s’ka rritje pagash

Sipas parashikimeve qeveritare, për punëtorët e sektorit publik, nuk do të ketë rritje të pagave gjatë tri vitet e ardhshme, pavarësisht premtimeve në fushatë zgjedhore

Foto ilustrim

Qeveria e Kosovës në Kornizën Afatmesme të Shpenzimeve (KASH) nuk ka parashikuar ngritjen e pagave, të paktën deri në fund të këtij mandati. Sipas këtij parashikimi, punëtorët e sektorit publik nuk do të kenë rritje të pagave gjatë tri vitet e ardhshme, pavarësisht premtimeve në fushatë zgjedhore.

Sipas këtij dokumenti qeveritar, shpenzimet për paga dhe mëditje do të kenë një rritje vjetore prej jo më të lartë se 0.4 për qind përgjatë periudhës afat-mesme, gjë që i bie që kjo rritje do të bëhet për të mbuluar pagesën për përvojën e punës dhe mëditjet tjera, por jo edhe rritje të pagës, raporton ORAinfo.

“Si rezultat i kufizimeve të larta buxhetore dhe ruajtjes së nivelit të shpenzimeve për kategoritë tjera ekonomike dhe projekteve zhvillimore që bartin në vete një kthim më lartë ekonomik, shpenzimet për këtë kategori janë planifikuar të kenë një ngritje vjetore prej jo më të lartë se 0.4% përgjatë periudhës afat-mesme”, thuhet në KASH.

Sipas dokumentit qeveritar, vitin që lëmë pas, kategoria e shpenzimeve për paga dhe mëditje përfaqëson pjesën më të madhe të shpenzimeve rrjedhëse përgjatë periudhës planifikuese.

Ngritja e theksuar në këtë kategori ka ndodhur në vitin 2014, si rezultat i vendimit të Qeverisë për ngritjen e pagave për shërbyesit civil në nivel prej 25 për qind. Kr Isa Mustafa dhe Hashim Thaçi, ish kryeministër, kanë premtuar ngrije pagaesh edhe për 25 për qind. Por pas marrjes së qeverisë, deklarata ishin ndryshe: “nuk ka para për ngritje pagash”.

Rrahman Jashari edhe kryetar i Sindikatës së Bashkuar të Arsimit (SBASHK). Ai ka thënë se zyrtarët qeveritarë u kanë premtuar atyre se gjatë këtij viti, pas rishikimit të buxhetit do të ketë ngritje të pagave.

“U kisha bërë thirrje qeverisë që mos të ngutet me planifikime të tilla, pasi që neve po na krijojnë telashe në terren. Ne kundërshtojmë kategorikisht synimet e qeverisë që mos të ketë rritje të pagave për tri vitet e ardhshme. Ne kërkojmë nga qeveria që të harmonizojnë qëndrimet e tyre dhe mos të dalin me deklarata kundërthënëse”, ka thënë ai.