Shqipëri, goditet rrjeti i trafikantëve me emigrantë

Në Shqipëri janë arrestuar pesë trafikantë të cilët i dërgonin shqiptarët drejt BE-së, Britanisë dhe Amerikës. Për Britani ua merrnin 5 mijë euro për SHBA 20 mijë dollarë

Policia e Shtetit në Shqipëri ka arrestuar pesë persona në Shkodër dhe Tiranë, nën dyshimin se janë përfshirë në veprimtari kriminale të trafikimit me emigrantë. Të arrestuarit posedonin një laboratorë modern për prodhimin dokumenteve të falsifikuara si dhe disa dokumente.

Operacioni është koduar “Emigracioni i Paligjshëm” është organizuar nga Sektori për Trafikun e Paligjshëm, ku pesë persona kanë përfunduar në pranga me akuzën e “favorizimit të kalimit të paligjshëm të kufirit” dhe “pjesëmarrje në grup të strukturuar kriminal”.

Të arrestuarit janë shtetasit Bajram Xhaja, 58 vjeç, banues në Tiranë, Kujtim Emiri, 59 vjeç banues në Tiranë dhe person me precedentë penalë në të shkuarën, Xhelil Alla, 43 vjeç, lindur në Peshkopi dhe banues në Tiranë, Sofije Pepa, lindur dhe banuese në Shkodër dhe MIhal Gjoka, 56 vjeç banues në Tiranë, raporton TCH.

Gjithashtu gjatë këtij operacioni janë zbuluar dy laboratorë falsifikimi dokumentesh dhe janë sekuestruar dy kompjuter, printera, makineri prodhimi kartash elektronike, një sasi e konsiderueshme parash, një automjet tip Mercedes Benz si dhe materiale të tjera që dëshmojnë aktivitetin e tyre kriminal.

Dyshohet se personat e arrestuar në bashkëpunim me njëri- tjetrin rekrutonin njerëz që ishin të interesuar të largoheshin nga Shqipëria në drejtim të vendeve të BE-së, Britanisë së Madhe, SHBA-ve dhe Kanadasë. Këtyre personave ata ua merrnin nga 5000 Euro për në vendet e BE-së dhe nga 20.000 dollarë për në vendet SHBA dhe Kanada.

“Ata pasi i pajisnin me dokumentacion të falsifikuar kryesisht italiane personat e interesuar, i instruktonin se si duhet të silleshin në aeroportet e huaja dhe i orientonin me anë të telefonit. Personat e interesuar për të kaluar kufirin në dalje nga Shqipëria përdornin pasaportë biometrike dhe në aeroportet e huaja përdornin pasaportat e falsifikuara me të cilat ishin pajisur nga grupi kriminal”, thuhet në raport.

Njëri laborator u gjet dhe u sekuestrua në banesën e shtetasit Kujtim Emiri, ndërsa laboratori i dytë u gjet në banesën e shtetasit Xhelil Alla. Materialet i kaluan Prokurorisë së Krimeve të Rënda për veprime të mëtejshme.