Ndërtimi i mirëbesimit, esencial për Kosovën

Ambasadorja zvicerane, Marty Lang e konsideron shumë të rëndësishëm ndërtimin e mirëbesimit ndërmjet komuniteteve në Kosovë

Ambasadorja e Zvicrës në Prishtinë, Krystyna Marty Lang tha se ndërtimi i mirëbesimit midis komuniteteve në Kosovë do të jetë shumë i rëndësishëm për gjithë procesin e integrimit. Megjithatë ajo ka vlerësuar se dialogu i Brukselit dhe rezultatet e prodhuara atje, po interpretohen në mënyra të ndryshme në Serbi dhe Kosovë.

“Ne po e shohim se sa i ngadalshëm është ndërtimi i besimit dhe sa lehtë është që të shkatërrohet ky besim kur politikanët, si ata shqiptarë apo serbë bëjnë deklarata provokuese”, ka theksuar ambasadorja Lang.

Këto deklarata diplomatja zvicerane i bërë gjatë një debati organizuar nga Grupi Ballkanik për Politika të titulluar: “Integrimi i serbëve në Kosovë pas marrëveshjes së Brukselit”.

Shuarja e plotë e sistemit paralel të Serbisë në Kosovë dhe ndërtimi i mirëbesimit, do t’i paraprinte integrimit të komunitetit serb në sistemin e shtetit të Kosovës, thuhet në raportin e prezantuar nga Grupi Ballkanik për Politika.

Ndonëse në këtë prezantim për debat ishin ftuar edhe kryeministri i Kosovës, Isa Mustafa dhe zëvendëskryeministri, Branimir Stojanoviq, nga Lista Serbe, ata nuk kanë marrë pjesë.

Ndërkaq, drejtori Ekzekutiv i Grupit Ballkanik, Marko Prelec ka thënë se arritja e marrëveshjes së parë për normalizim të marrëdhënieve ndërmjet Prishtinës dhe Beogradit në Bruksel, ishte pjesa e lehtë e punës, krahasuar me zbatimin e saj në terren.

“Ajo që po trajtojmë në të vërtetë këtu ka të bëjë me ecjen përpara nga gjendja, të cilën e kemi sot, në të cilën ende kemi dy sisteme që funksionojnë, atë të Serbisë dhe Kosovës. Qëllimi duhet të jetë që të kalohet vetëm në një sistem – atë të shtetit të Kosovës”, ka deklaruar Prelec, raporton REL.

Komunat me shumicë serbe, ka vijuar Prelec, ballafaqohen me problemin e funksionimit paralel të kryetarëve të zgjedhur dhe atyre paralel. Në disa raste, sipas tij, kryetarët paralel janë po ata të zgjedhur, e në raste tjera, kryetarët e komunave serbe janë edhe zyrtarë që mbajnë poste në Serbi.

Integrimi i komuniteteve krahas funksionimit të shtetit të Kosovës, është parë si çështje esenciale edhe nga ambasadori i Norvegjisë në Prishtinë, Jan Braathu. “Pavarësia e Kosovës është arritur mbi bazën e marrëveshjes. E marrëveshja ishte integrimi i komuniteteve pakicë në sistemin e Kosovës, në harmoni me standardet evropiane”, ka theksuar ambasadori norvegjez.