Akuza tifozëve të FC Luzernit për antisemitizëm

Tash ky rast do të bëhet edhe objekt i ndjekjes penale nga Prokuroria e St. Gallenit

Një skandal që ka ndodhur të dielën, kur tifozët e klubit të  futbollit FC Luzern ndiqnin një tifoz të St. Gallenit të veshur si hebre, ka ngjallur reagime të ashpra në opinionin zviceran. Tash ky rast do të bëhet edhe objekt i ndjekjes penale nga Prokuroria e St. Gallenit. Kryeprokurori i St. Gallenit Thomas Hansjakob ka konfirmuar për mediet se ndjekja penale është realitet.

“Mendoj se ka qenë një aksion pa shije dhe i shëmtuar” ka thënë ai për 20minuten. Por ai ka shtuar se duhet te dokumentohet nëse rasti përbën një akt antisemitist dhe racist ose jo.

Por, në gazetën “SonntagsZeitung” Hansjakob ishte shprehur ndryshe: “Ne e kemi konsideruar si punë karnavali kështu që nuk bëhet fjalë për ndjekje penale”. Por kjo deklaratë e tij ka ngjallur reagime të ashpra nga komuniteti i hebrenjve në Zvicër. “Kjo nuk ka qenë një shaka e zakonshme karnavalesh. Duhet të sqarohet nëse tifozët e Lucernit duhen ndjekur penalisht ose jo”, ka thënë një përfaqësuese e Federatës Izraelite të Zvicrës (SIG).

Shkrimtari zviceran i përkatësisë hebreite Thomas Meyer e akuzon prokurorin: Ai është dashur të mendonte që në fillim se çfarë duhej të thoshte para medieve. Në fotografi shihet qartë se hebrenjtë janë ata që vihen në lojë dhe për këtë nuk nevojiten informacione shtesë”.