Katerina Hajna është një ndër masterchef-et më të njohura në fushën e kulinarisë në Greqi

Me artin e të gatuarit dhe servirjen artistike, Katerina rrëmbeu zemrën dhe shijen e klientëve që provonin pjatat e saj

Katerina Hajna është një ndër masterchef-et më të njohura në fushën e kulinarisë jo vetëm në Athinë, por edhe në ishujt më të njohur dhe turistikë grekë, apo vende të tjera turistike. Ajo përfudoi studimet në School of Tourism Professions, shkollë profesionale shtetërore për shefe kuzhine dhe aktualisht është “Executive Chef” në Omilos Kastelorizo në Athinë, përcjell albinfo.ch.

Lindur në vitin 1980 në Progonat të Tepelenës, Katerina Hajna është një ndër masterchef-et më të njohura në fushën e kulinarisë në Athinë dhe jo vetëm. Pasi mbaroi shkollën tetëvjeҫare në vendlindje, Katerina vijoi studimet e shkollës së mesme në Sarandë, të cilat i përfundoi me sukses.

Pas mbarimit të shkollës së mesme, Katerina vendosi të niste një rrugëtim të ri të jetës së saj, në kërkim të një aventure e ëndrre rinore. Vendi që ajo vendosi të niste këtë rrugëtim si personal, ashtu edhe profesional ishte vendi fqinj, Greqia, e njohur për kulinarinë e saj të shumëllojshme. Por edhe pse gatimi ishte pasioni i saj, zgjedhja e momentit u bë estetika në Amadoros Akademi. Por pavarësisht kualifikimit të saj në fushën e estetikës, Katerina këmbëngulte në pasionin e saj, kulinarinë, duke u punësuar në një restorant si ndihmëskuzhiniere. Kuptohet kjo ishte shumë pak për Katerinën. Këmbëngulja e gërshetuar me pasionin, dhe shërbimi cilësor që ofronte, bëri që në 2005-ën të emërohej si kuzhiniere e parë po në këtë restorant.

Me artin e të gatuarit dhe servirjen artistike, Katerina rrëmbeu zemrën dhe shijen e klientëve që provonin pjatat e saj. Vlerësimi nga njerëzit që e rrethonin dhe ata që provonin gatimet e saj, i nxitën dëshirën dhe idenë të kualifikohej profesionalisht. Më 2013 diplomohet me sukses në School of Tourism Professions, shkollë profesionale shtetërore për shefe guzhine. Së bashku me rritjen e djalit të saj, rritej edhe profesionalisht. Filloi të shpaloste aftësitë e saj herë si shefe kuzhine, herë si kreatore menush, herë si trajtuese e stafit të restoranteve, konkretisht restorant Burnovalia; Meli Ladi; Zimari Bakery & Coffee; Gnision; Platanos.

Që prej vitit 2016 Katerina është një ndër  “Executive Chef” më të njohurat dhe më të kërkuarat jo vetëm në Athinë, por edhe në ishujt më të njohur dhe më turistikë, apo vende të tjera turistike, si Miky Espresso Bar; Benji Athens; Restorant Yolo, San Torini; Kati Psinete, Porto Heli; Galini Fish Restaurant, Santorini; Brigada Greek Restaurant; Restorant Dhow Mozambique, Afrikë; Restorant By Mykonos, Maltë; Gjiro Asirmatou, King of Suvlaki, etj etj. Aktualisht Katerina është “Executive Chef” Omilos Kastelorizo Raki Meze në Athinë.

Profesioniste e heshtur, por e dashur dhe e komunikueshme për klientët, Katerina është pjesë e atyre njerëzve të që me punën e tyre kontribuojnë ҫdo ditë  në imazhin e komunitetit tonë, që tashmë është pjesë e mirintegruar e jetës sociale greke, duke mos harruar rrënjët e tyre.

 

---