Adea Zenelaj dhe Dijeton Selimi morën titullin “Recituesi i dalluar” në Vjenë

Për nder të 13-vjetorit të Pavarësisë së Republikës së Kosovës, me 19. 02. 2021, Shoqata e Mësuesve Shqiptarë „Naim Frashëri“ në bashkorganizim me Ambasadën e Republikës së Kosovës në Austri realizoi me sukses aktivitetin „Recituesi i dalluar” me nxënësit e përzgjedhur nga mësuesit e tyre nga tërë Austria. Programi u oranizua në mënyrë virtuale, online!

Në fjalën përshëndetëse Ambasadori ju uroj 17 Shkurtin – Ditën e Pavarësisë së Kosovës dhe falënderoi mësuesit për angazhimin e tyre jo vetëm për organizimin e këtij evenimenti, por edhe në ruajtjen e gjuhës, kulturës dhe traditës shqiptare tek fëmijët tanë. Ai, ftoi mësuesit në një takim me prezencë fizike, apo takim virtual, varësisht nga rrethanat me pandeminë, për të artikuluar së bashku kërkesat rreth masivizimit të mësimit në gjuhën shqipe.

Zonja Miradije Berishaj, kryetare e SHMSH „Naim Farashëri“ gjithashtu uroi „13 vjetorin e Pavarësisë së Republikës së Kosovës“, falënderoi ambasadorin Pllana dhe stafin e tij për bashkëpunim të mirë, kolegët, nxënësit dhe prindërit pjesëmarrës në program!

Në këtë aktivitet morën pjesë: Antigone Elshani me nxënësit Edon Çekaj dhe Sead Hetemaj-Austri e ulët; Feride Aradini me nxënësen Gjeneta Kabashi – Kärnten; Fitnete Cengu më nxënësit Drin dhe Mal Salihi – Salzburg; Merita Smaili me nxënësin Lutfi Muslii- Austri e ulët; Miradije Berishaj me nxënësit Adea Zenelaj dhe Albanot Kuçi- Vjenë; Osman Ademi më nxënësit, Albanit Kodra dhe Dijeton Selimi- Vjenë; Roza Nrecaj me nxënëset: Diana Elshani dhe Ardiana Osmani- Steiermark. Takimin e moderoi me sukses zonja Shkurte Krasniqi nga stafi i ambasadës!

Në përfundim tё aktivitetit të zhvilluar online, komisioni i përberë nga ambasadori i R. së Kosovës z. Lulzim Pllana, znj. Violeta Allmuca shkrimtare dhe z. Anton Marku poet dhe publicist, nuk kishin aq lehtë, siç thanë ata, te zgjedhin më të mirët. Megjithatë titulli “Recitues i dalluar” ju dha nxënësve: Adea Zenelaj nxënëse e klasa e tretë cikli i ulët, Vjenë dhe Dijeton Selimi nxënës i klasës së tretë ciklit të lartë, Vjenë!

Në kuadër të këtij aktiviteti nga SHMSH “Naim Frashëri“ ju ndau mirënjohje mësuesve që kanë kontribuar dhe po kontribojnë në mësimin e gjuhës shqipe në Austri: Ibrahim Hasanaj 25 vite punë; Roza Nrecaj 20 vite punë; Miradije Berishaj 20 vite punë dhe Rafete Kosumi 15 vite punë.

Përshëndetje dhe mesazh në emër të nxënësve për të gjithë fëmijët e shkollës obligative në Austri dha nxënësi Fatlind Ademi. Porosia për moshataret e tij ishte shumë e qartë: „Unë marrë pjesë në mësim në gjuhën shqipe. Po ti çfarë pret? Eja edhe ti! Eja bashkohu me ne, mos ke frikë. Është gjuha jonë! Është kultura jonë! Tek e fundit ne fëmijët jemi ardhmëria e vendit tonë“.

Në të vërtet angazhimi i mësuesve shqiptarë në Austri është për tu vlerësuar në përgjithësi, ndërsa angazhimi i zonjës Berishaj si kryetare e SHMSH “Naim Frashëri” në veçanti! Tani më edhe në kohë pandemie po dëshmojmë se mund t’i përshtatemi formave të reja të organizimit të aktiviteteve me nxënës duke mos lënë anash kurrësesi shënimin e festave të rëndësishme kombëtare!

Shoqata e Mësuesve Shqiptarë „Naim Frashëri” falënderon Ambasadën e Republikës së Kosovës, ambasadorin z.Lulzim Pllana, znj. Shkurte Krasniqi dhe stafin e Ambasadës, anëtarët e komisionit vlerësues, mësuesit pjesëmarrës, nxënësit dhe prindërit e tyre në realizimin e këtij aktiviteti edhe në kohë pandemie!

Për nxënësit pjesëmarrës në program SHMSH „Naim Frashëri“ ju dhuron nga një libër shkollor, ndërsa nga ambasada e Republikës se Kosovës nga një dhuratë modeste dhe një falënderim.

Në fund fare, ne falënderojmë shtetin austriak që na mundëson mësimin edhe në gjuhën shqipe në shkollat publike, duke marrë përsipër financimin dhe organizimin në bazë të normave dhe rregullave ligjore!

Gëzuar 13 vjetori i Pavarësisë së Republikës së Kosovës!

 

---