Grabitje me eksploziv në një bankomat në Prishtinë

Të dyshuarit në ikje kanë shtënë me armë në drejtim të rojës.

Është bërë e ditur se një shpërthim ka ndodhur sot në orët e para të mëngjesit në rrugën B në Prishtinë. Sipas policisë, një grabitje është realizuar duke dëmtuar një bankomat, me një mjet shpërthyes nga disa persona të dyshuar, të cilët derisa kanë ikur, kanë shtënë me armë zjarri në drejtim të rojës së bankës.

Zëdhënësja e policisë për rajonin e Prishtinës, Flora Ahmeti, është shprehur se nuk raportohet për të lënduar.

“Sot rreth orës 05:30, kemi pranuar informatën për një shpërthim në rrugën “B” në Prishtinë. Menjëherë pas marrjes së këtij informacioni strukturat rajonale për hetimin e krimit me një intensitet të shtuar kanë filluar ndërmarrjen e një varg veprimesh operative dhe hetimore. Mbështetur në rezultatet e para të grupit hetimor, dyshohet se një grabitje është realizuar duke dëmtuar një bankomat të një banke, me një mjet shpërthyes (eksploziv), nga disa persona të dyshuar të cilët në ikje e sipër kanë shtënë  edhe me armë zjarri  në drejtim të një personi (roje). Nuk raportohet për persona të lënduar”, ka thënë Ahmeti.

“Derisa ekzaminimi po vazhdon në vendngjarje, hetuesit policorë janë duke punuar në identifikimin dhe arrestimin e personave të dyshuar”, ka thënë në fund Ahmeti.

---