Hoti: Situata Covid është nën kontroll, jemi më mirë se rajoni dhe Evropa

Pas rasteve të shumta që u raportuan dje me Covid, ka reaguar edhe kryeministri i vendit, Avdullah Hoti.

Me anë të një postimi në Facebook, Hoti ka thënë se vetëm duke u respektuar masat mund ta vëmë në kontroll këtë valë të dytë të virusit.

Gjihashtu ai në postim ka përmendur se numri i testimeve po rritet, e bashkë me të edhe numri i rasteve, mirëpo që sipas tij Kosova vazhdon ta ketë situatën nën kontroll.

Postimi i plotë:

Të gjithë duhet të bëjmë pjesën tonë!

Vetëm duke mbajtur maskën dhe duke ruajtur distancën, mund ta fusim nën kontroll këtë valë të dytë të #COVID19 dhe ta mundim virusin.

Numri i testimeve për COVID-19 po rritet, sikurse po rritet edhe numri i rasteve. Ne vazhdojmë ta kemi situatën nën kontroll dhe kemi shumë më pak të infektuar në krahasim me rajonin dhe Evropën. Institucionet tona po e bëjnë të pamundurën që ta mbajnë nën kontrollë këtë situatë, sidomos stafi shëndetësor, prandaj t’i ndihmojmë ata.

Ta bëjmë këtë për shëndetin tonë, të familjes dhe të afërmve tanë. Ta bëjmë për mirëqenien tonë.

Trajektores së kuqe që ka filluar të ngrihet, mund t’ia ndalim hovin vetëm duke i rrespektuar masat për parandalim të përhapjes së virusit.