Masa më të rrepta në mbikëqyrje të situatës në Malishevë

Pas marrjes së informacionit për një rast të prekur me COVID-19, Komuna e Malishevës, në bazë të rekomandimeve të institucioneve shtetërore, thotë se i ka marrë të gjitha masat e nevojshme për mbikëqyrjen e situatës.

Përmes një njoftimi për media, theksohet se ka përfunduar edhe takimi i përbashkët në mes Këshillit Komunal për Menaxhimin e situatës me COVID-19, Institutit Rajonal të Shëndetit Publik në Prizren, QKMF-së dhe Policisë së Kosovës, dhe janë bashkërenduar të gjitha aktivitetet lidhur me rastin, ku janë duke identifikuar të gjithë personat që kanë pasur kontakte me pacientin, të cilët edhe janë duke u vetizoluar, si dhe në të gjitha hyrje-daljet e Komunës së Malishevës, bazuar në mesazhin e marrë nga kryeministri i vendit, janë duke u vendosur patrullat policore.

“Zyrtarët e IRSHP-së, janë duke e trajtuar rastin dhe janë duke u dhënë udhëzimet e nevojshme të gjithë atyre personave që kanë pasur kontakt me pacientin tashmë të diagnostifikuar me COVID-19. Me këtë rast, kryetari i Komunës së Malishevës, Ragip Begaj, u ka bërë thirrje qytetarëve që të mos shqetësohen, por t’i zbatojnë udhëzimet e dhëna nga ana e IKSHP-së dhe Qeverisë së vendit”, thuhet në njoftim.

Të gjitha organet kompetente komunale, në bashkëpunim dhe në koordinim me Ministrinë e Shëndetësisë dhe IKSHP-së, janë duke e menaxhuar situatën, prandaj nuk ka vend për panik, por ne të gjithë së bashku duhet t’iu përmbahemi udhëzimeve që janë duke u shfaqur në vazhdimësi në mjetet e informimit dhe rrjetet sociale, përcjell Albinfo.ch.