Tiranë-Prishtinë, marrëveshja e parë

Nënshkruhet marrëveshja e parë e bashkëpunimit midis Komunës së Prishtinës dhe Ministrisë së Zhvillimit Ekonomik të Shqipërisë

Përfaqësuesit e Komunës së Prishtinës dhe ata të Ministrisë shqiptare të Zhvillimit Ekonomik, Tregtisë dhe Sipërmarrjes, kanë nënshkruar marrëveshjen e parë të bashkëpunimit, që nisë të implementohet gjatë ditëve të pavarësisë. Marrëveshja zbatohet nëpërmjet Qendrës Kombëtare të Panaireve (QKP) e cila është nën vartësinë e ministrisë shqiptare.

Sipas një njoftimi, në këtë marrëveshje parashikohet bashkëpunimi dhe bashkëfinancimi për një sërë aktivitetesh në datat 27-28 nëntor 2014 në shënimin e Ditës së Pavarësisë.

“Aktivitetet do të përfshijnë organizimin e Panairit “Blej Shqip” në qendër të Prishtinës me prodhues dhe kompani nga treva të ndryshme shqiptare, koordinimin e takimeve mes kompanive të ndryshme shqiptare për rritjen e bashkëpunimit, si dhe një program të larmishëm artistiko-kulturor që do të zhvillohet paralel me aktivitetet e Panairit”, thuhet në njoftim.

Marrëveshja mes dy institucioneve u nënshkrua nga drejtori i Drejtorisë së Ekonomisë dhe Zhvillimit në Komunën e Prishtinës, Genc Bashota dhe nga titullarja e Qendrës Kombëtare të Panaireve, Elisabeta Katiaj.

“Kjo marrëveshje parashikohet të jetë vetëm një hap i parë drejt bashkëpunimit të mëtejshëm në të ardhmen në aktivitete që ndihmojnë dhe promovojnë prodhuesit dhe kompanitë shqiptare duke zgjeruar dhe konsoliduar tregun vendas”, thuhet në njoftimin e lëshuar nga Komuna e Prishtinës.