Testohet interneti falas nëpër trenat e Zvicrës

(KEYSTONE/Georgios Kefalas)

Rrjeti Hekurudhor i Zvicrës ka filluar testimin e internetit 3G/4G nëpër trena, që do t’u ofrojë qasje falas udhëtarëve nëpër rrugët kryesore të trenit, shkruan swissinfo.ch. Megjithatë, kjo nuk i përfshin të gjithë operatorët zviceranë, përcjell albinfo.ch.

Testimi ka filluar në 44 trena mes Cyrihut e Gjenevës, St Gallenit e Lozanës dhe nga Baseli në Biel, sipas një njoftimi nga rrjeti.

Për të përfituar internet falas në tren, udhëtarët duhet të kenë një telefon mobil dhe një SIM kartelë zvicerane nga operatoret Salt ose Sunrise.

Përdoruesit po ashtu duhet ta shkarkojnë aplikacionin “FreeSurf SBB” dhe të identifikohen përmes një numri të telefonit.
Pas regjistrimit dhe aktivizimit, ata marrin konfirmimin se mund të shfletojnë internet falas nëpërmjet operatorit të tyre. Kur udhëtari largohet nga treni ose nëse lidhja ndërpritet, atyre iu dërgohet një njoftim se qasja në internet më nuk është aktive.

Ndërkaq, po shqyrtohet mundësia për të gjetur një zgjidhje që ky shërbim të ofrohet edhe pa pasur nevojë për SIM kartelë, edhe për shkak të turistëve.