Snowden kërkon azil në Zvicër?

Përveç në Rusi dhe në disa vende tjera, ish agjenti sipas Wikileaks, ka kërkuar azil edhe në Zvicër

Ish agjenti i rebeluar i shërbimit sekret amerikan Edward Snowden, i bërë i njohur për publikimin e të dhënave të rëndësishme shtetërore, për të cilat ishte i detyruar të heshtte, vazhdon të ketë telashe me azilin e tij. Ai ka ngritur akuza ndaj SHBA-së, e cila, siç bën të ditur organizata Wikileaks, po provon ta ndalojë atë që të marrë azil në disa vende. Madje, pasaportën e tij SHBA-ja e ka shpallur të pavlefshme, përkundër faktit se asnjë gjykatë nuk e ka shpallur Snowdenin fajtor.

Përveç në Rusi dhe në disa vende tjera, ish agjenti sipas Wikileaks, ka kërkuar azil edhe në Zvicër. Ndërsa, siç qe bërë e ditur ditë më parë në medie, Snowden kishte drejtuar kritika të ashpra ndaj Zvicrës dhe zviceranëve, duke i quajtur këta të fundit veç tjerash edhe racistë.

Ndërkohë, presidenti rus, Putin kishte deklaruar se Snowden mund të mbetet në Rusi por me kushtin që me veprimet e tij të mos i shkaktojë më dëme SHBA-së. I përballur me këtë kusht, Snowden ka refuzuar azilin në Rusi, njofton një zëdhënës i Kremlinit.