Për trajtim të barabartë të prindërve të shkurorëzuar

Dhoma Nacionale ka vendosur me shumicë votash që çiftet tashmë të shkurorëzuara duhet të marrin së bashku të drejtën e kujdesit për fëmijët

Dy dhomat e Parlamentit të Zvicrës kanë qëndrim te njëjtë për atë se prindërit e shkurorëzuar, me ligjin e rishikuar duhet të fitojnë së bashku të drejtën e kujdesit për fëmijët e tyre. Por, qëndrimet ndryshojnë kur shtrohet çështja se cilat çifte vlen rregullimi i ri e për cilat jo.

Edhe në seancën e dytë mbi rishikimin e pjesshëm të Ligjit mbi të drejtën civile, të mbajtur të hënën, Dhoma Nacionale ka vendosur me shumicë votash që të gjitha çiftet tashmë të shkurorëzuara duhet të marrin së bashku të drejtën e kujdesit për fëmijët. Ndërkohë, një pakicë në këtë dhomë, ashtu sikurse shumica në dhomën tjetër, të kantoneve, konsideron se veprimi i ligjit të rishikuar të kufizohet vetëm te çiftet që janë shkurorëzuar jo më gjatë se pesë vite më parë.

Dhoma Nacionale me 117 vota pro dhe 66 kundër ka votuar kundër kufizimit kohor të veprimit retroaktiv (prapaveprues) të rregullimit të ri të kësaj çështjeje.

Ndërsa lidhur me nenin e veçantë, atë që rregullon çështjen e shpërnguljes së njërit prind, Dhoma Nacionale ka votuar njësoj sikur ajo e kantoneve. Megjithatë, me rekomandimin e komisionit të vet, dhoma nacionale ka vendosur për një regjim më të butë në rastet e ndërrimit të vendbanimit të njërit nga prindërit ose të fëmijës. Prindi tjetër është i detyruar të japë pëlqimin e tij vetëm në rastet kur ndërrohet vendbanimi i fëmijës. Ndërsa, nëse njëri prind e ndërron vendbanimin, do të mjaftojë vetëm një informacion i thjeshtë që ai/ajo duhet t`ia japë prindit tjetër.

Me rishikimin e Ligjit të të Drejtës Civile Qeveria Federale synon të realizoje përshtatjen e ligjit me realitetin në praktikë, që tregon se shkalla e shkurorëzimeve në Zvicër ka arritur afër 50 përqindëshit.  Me të renë, e drejta e kujdestarisë për fëmijën bëhet e pavarur nga statusi civil i prindërve, nëse ata e bëjnë një kërkesë të përbashkët dhe mund të pajtohen lidhur mbështetjen dhe përkujdesjen e fëmijës. Projektligji tashti kthehet në Dhomën e Kantoneve.