QKUK me shërbim të Radioterapisë

Shërbimi i Radioterapisë tash e tutje do t’u ofrojë shërbime të gjithë qytetarët të Kosovës për të gjitha llojet e rrezatimeve

Pacientët kosovarë që vuajnë nga llojet e ndryshme të tumoreve nuk do të kenë nevojë  të trajtohen më, nëpër qendrat e ndryshme të rajonit. Kjo për faktin se nga dita e sotit, Në Qendrën Klinike Universitare të Kosovës (QKUK) është lëshuar në punë, Shërbimi i Radioterapisë, duke funksionalizuar kështu Institutin e Onkologjisë.    

Ky shërbim radioterapeutik tash e tutje do t’u ofrojë shërbime të gjithë qytetarët të Kosovës për të gjitha llojet e rrezatimeve. 

Me këtë rast, ministri i Shëndetësisë, Ferid Agani tha se pas 13 vjetëve, po arrihet të lëshohet në punë ky shërbim i rëndësishëm, i cili kompleton në tërësi shërbimet në Institutin e Onkologjisë. Sipas tij, kjo po bëhet falë punës dhe angazhimit të Ministrisë së Shëndetësisë, QKUK-së dhe punëtorëve shëndetësorë.

“Jam optimist se do të ngrisim cilësinë dhe do ta lehtësojmë trajtimin  e pacientëve tanë, jemi të përkushtuar dhe po punojmë vazhdimisht që këto shërbime të jenë të përditshme dhe pacientët mos të referohen jashtë vendi”, deklaroi ministri Agani. 

Ai tha se Ministria e Shëndetësisë, përmes konkursit publik, ka pranuar në punë specialistë të rinj të onkologjisë në mënyrë që Instituti Onkologjik, të kompletohet në tërësi me staf. Agani bëri të ditur, se së shpejti pritet të lëshohet në punë edhe  Shërbimi i Kardiokirurgjisë.

Ndërsa Behxhet Osmani, ushtrues detyre i drejtorit të Institutit të Onkologjisë, tha se stafi i Institutit është i përgatitur për trajtim të rasteve kurative.

“Deri tani kemi 4 pacientë, presim edhe pacientë të tjerë, përderisa puna do të organizohet në dy ndërrime, rastet do të trajtohen çdo ditë dhe nuk do të ketë nevojë për referim të tyre jashtë vendi”, tha ai.

Në anën tjetër, readioterapeutja Sonja Blakaj, tha se stafi i shërbimit të radioterapisë  është i përgatitur t’i ofrojë këto shërbime dhe aparatura është e përgatitur. “Disa herë janë bërë matje të objektit dhe nuk ka rrezatim të lartë, pritet të sigurohet së shpejti edhe aparatura që do bëjë matjen ditore të rrezatimit”, tha Blakaj.

Gjatë ditës së sotme, radioterapia kurative është kryer tek një paciente, përderisa gjatë ditëve në vijim do të vazhdohet me radioterapi për rastet tjera.

 Ndryshe, gjatë viteve të kaluara pacientët kosovarë që kanë vuajtur nga tumoret e ndryshëm, iu kanë nënshtruar rrezatimeve nëpër qendrat e ndryshme spitalore të rajonit, Shkup, Tiranë, Beograd, Stamboll dhe në vendet tjera rajonale. Trajtimi ka qenë shumë i shtrenjtë.