I kurdiset bombë në dritare të shtëpisë!

Zëdhënësi i Komunës së Mitrovicës, Ahmet Jashari tha se brenda dy javësh në veriun e Mitrovicës kanë ndodhur 18 shpërthime

Intensifikimi i bisedimeve në Bruksel ndërmjet Prishtinës dhe Beogradit është manifestuar me një valë shpërthimesh në veriun e Kosovës, i cili ka qenë objekt diskutimi në dy rrethet e fundit të negociatave. Shtëpia e boshnjakut Tahir Memoviqi, ka qenë mbrëmë në shenjtër të grupeve kriminale.

Në shtëpinë e tij është aktivizuar një mjet shpërthyes, i cili përveç dëmeve materiale nuk ka shkaktuar lëndime në njerëz. Mjeti shpërthyes,  siç kanë raportuar mediat serbe, ishte vënë në dritaren e shtëpisë së
Memoviqit, ku edhe vërehen dëmet më të mëdha.

Në momentin e shpërthimit në shtëpi kanë qenë shatë persona, por asnjëri nuk kishte pësuar lëndime. Në vendin e ngjarjes, si rëndomë kanë dalë pjesëtarë të Policisë së Kosovës, ata të EULEX-it dhe paqeruajtësit ndërkombëtarë të KFOR-it.

Këto shpërthime që janë bërë rutinë në veriun e Mitrovicës të dominuar nga serbët, po shqetësojnë tej mase banorët joseë të lagjeve “Kroi i Vitakut”, “Lagja e Boshnjakëve”, “Tre Rrokaqiejt”. Sulmuesit në cak kanë pasur kryesisht qytetarët që punojnë në institucionet e Kosovës.

Zëdhënësi i Komunës së Mitrovicës, Ahmet Jashari tha se me shpërthimin e mbrëmshëm për dy jave në veriun e Mitrovicës kanë ndodhur 18 shpërthime, ku për fat ka pasur vetëm dëmtime materiale, por jo edhe viktima.

“Ka qenë një periudhe mjaft e tensionuar, meqë banorët jo serbë janë mjaft të shqetësuar me këtë situate. Si rrjedhojë Komuna e Mitrovicas për dallim prej me herët, këto ditë është duke mbajtur takime javore të Komitetit të Sigurisë për të koordinuar aktivitetet me strukturat e rendit në mënyrë që të menaxhohet sa ma mirë situata e krijuar”, tha Jashari për “Albinfo.ch”.

Organet e sigurisë, sipas tij, kanë shtuar masat në lagjet e përziera me qëllim që banorët atje të ndihen me të sigurt. “Është për t’u vlerësuar maturia e qytetarëve, të cilët janë treguar shumë të përgjegjshëm duke ndikuar që situata të mos eskalojë”, tha Jashari, sipas të cilit, Komuna e Mitrovicës është në kontakt të vazhdueshëm me banoret në veriun e vendit, në mënyrë që të mos lejohet përhapjen e panikut.

“Është tendencë e strukturave serbe të frikësojnë masën dhe me arratisjen e tyre të ndryshojnë strukturën etnike, para se të përmbyllët dialogu ndërmjet Kosovës dhe Serbisë”, konsideron Jashari.