Van Rompuy: Dialogu e vetmja rrugë për BE!

Dialogu është në funksion të frymës evropiane për të tejkaluar problemet e të kaluarës dhe për t’iu ofruar perspektivë të gjithë qytetarëve, tha presidenti i BE-së

Presidenti i Këshillit Evropian, Herman van Rompuy i dha mbështetje të fuqishme dialogut Prishtinë-Beograd edhe në nivel presidentësh, ndërsa ritheksoi gatishmërinë e BE-së për t’i pranuar në gjirin e saj edhe vendet e Ballkanit Perëndimor.

Rompuy theksoi se për të gjitha vendet e rajonit perspektiva evropiane është e qartë dhe e hapur dhe ato duhet të punojnë për të ndërtuar ura të bashkëpunimit të ndërsjellë.

Këto komente ai i bëri gjatë një takimi që zhvilloi në Bruksel më presidenten e Kosovës, Atifete Jahjaga. Rompuy e përgëzoi këtë të për rolin dhe angazhimin e saj të drejtpërdrejtë në mbështetje të dialogut që po zhvillohet në Bruksel.

Dialogu, sipas tij, është në funksion të frymës evropiane për të tejkaluar problemet e të kaluarës dhe për t’iu ofruar perspektivë të gjithë qytetarëve.

Presidenti Rompuy theksoi se për të gjitha vendet e rajonit perspektiva evropiane është e qartë dhe e hapur dhe ato duhet të punojnë për të ndërtuar ura të bashkëpunimit të ndërsjellë.

Presidentja Jahjaga, ndërkaq e falënderoi presidentin Rompuy për mbështetjen e tij dhe të institucioneve të Bashkimin Evropian për perspektivën e qartë evropiane të Kosovës dhe të gjithë rajonit.

Ajo tha se Kosova ka bërë përparime të theksuara në përmbushjen e kritereve dhe standardeve për fillimin e negociatave për Marrëveshjen e Stabilizim Asociimit, si  edhe në përmbushjen e kritereve për liberalizim të vizave, që qytetarët e Kosovës të udhëtojnë lirshëm si të gjithë qytetarët e tjerë të vendeve të rajonit.

Presidentja kosovare tha se institucionet dhe e gjithë shoqëria në Kosovë janë të përkushtuar për ndërtimin e shtetit të së drejtës ku sundon ligji dhe rendi.

“Lufta kundër korrupsionit dhe krimit të organizuar është përparësi e punës dhe Kosova ka ngritur të gjithë mekanizmat e nevojshëm për të luftuar këto fenomene negative”, tha ndërkaq Jahjaga, sipas të cilës, Kosova është faktor paqeje dhe stabiliteti në rajon dhe promovuese e fqinjësisë së mirë.

Ajo tha se mbështet dialogun, e ndërmjetësuar nga BE-ja dhe me mbështetje të fuqishme të SHBA-së që po zhvillohet ndërmjet Kosovës dhe Serbisë, për normalizimin e marrëdhënieve dhe për lehtësimin e jetës së qytetarëve të të dyja vendeve.

“Edhe takimi i Presidentëve të të dyja vendeve, që ndërmjetësohet nga BE-ja, është në funksion të normalizimit dhe relaksimit të marrëdhënieve ndërmjet Republikës së Kosovës dhe Republikës së Serbisë, dy shteteve që aspirojnë anëtarësimin në BE”, tha Jahjaga.