Autoritetet kosovare dënojnë sulmin ndaj Ambasadës në Paris

Ministria e Punëve të Jashtme të Kosovës, ka konfirmuar nëpërmjet një njoftimi për media se Ambasada e Republikës së Kosovës në Paris është sulmuar në orët e vona të së premtes nga huliganë, të cilët kanë dëmtuar pllakën zyrtare të ambasadës, duke shkruar simbole dhe parulla serbe.

Zëvendësministrja Vlora Çitaku, në një prononcim për mediet në Prishtinë, e ka dënuar këtë akt vandalizmi kundër përfaqësisë së Kosovës në Paris.

Ministria e Punëve të Jashtme e Kosovës njofton se tashmë po kryhen hetimet nga policia franceze, ndërkohë që dyshohet se akti është kryer nga pjesëtarë të komunitetit serb.

Ambasada e Republikës së Kosovës në Paris në një deklaratë të lëshuar për media e ka cilësuar këtë sulm si akt i përdhosjes së stemës së Republikës së Kosovës dhe njëkohësisht akt vandalizmi e rrugaçërie politike kundër përfaqësisë zyrtare të Republikës së Kosovës në Paris.

Ambasada e Republikës së Kosovës ka kërkuar nga autoritetet franceze ndërmarrjen e masave të zakonshme në këto raste.

Organet e hetuesisë së policisë franceze kanë dal në vendin e ngjarjes dhe pritet që autoritetet franceze të shtojnë masat e sigurisë përreth ambasadës.

Ky është rasti i dytë brenda një periudhe të shkurtër që në vendet e BE-së sulmohet ambasadat kosovare, pas djegies së flamurit të Kosovës në ambasadën në Romë