Ansambli “Trojet” prezantohet sonte me valle shqiptare në festivalin ndërkulturor në Winterthur

Vallet dhe traditat shqiptare prezantohen nga ansambli “Trojet” në një mbrëmje ndërkulturore me pjesëmarrjen e komuniteteve nga kultura të ndryshme në Winterthur.

Në Winterthur do të mbahet një aktivitet i veçantë në kuadër të festivalit ndërkulturor “Interkulturell – Kulturen stellen sich vor”, ku komunitete të ndryshme do të prezantojnë traditat dhe kulturat e tyre, transmeton albinfo.ch.

Në këtë ngjarje kulturore do të marrë pjesë edhe ansambli shqiptar “Trojet”, i cili do të sjellë për publikun valle tradicionale nga trevat shqiptare, duke prezantuar bukurinë dhe pasurinë e kostumeve kombëtare dhe traditës folklorike shqiptare.

Programi artistik do të zhvillohet sonte, më 9 maj 2026, nga ora 16:00 deri në 19:00, në Archplatz Festzentrum, ku përveç valleve shqiptare do të prezantohen edhe valle tradicionale nga kultura të ndryshme, përfshirë ato greke, zvicerane, boliviane, meksikane dhe ukrainase.

Gjatë aktivitetit do të ketë edhe një kënd me ushqime tradicionale shqiptare, ku vizitorët do të mund të shijojnë specialitete si flija dhe byrek, të përgatitura nga familje të komunitetit shqiptar.

Të ardhurat nga shitja e ushqimeve do të shërbejnë për të mbështetur ansamblin “Trojet” në mbulimin e shpenzimeve të udhëtimit për pjesëmarrjen në një festival kulturor në Detroit në United States.

Aktiviteti pritet të bashkojë komunitete të ndryshme dhe të promovojë dialogun kulturor përmes muzikës, valleve dhe traditave./Albinfo.ch

---