Të huajt, më shumë japin se sa marrin nga arkat pensionale

Të huajt marrin pjesë me 26.7 për qind në mbushjen e arkave, ndërkohë që pjesëmarrja nga përfitimet prej tyre është gjithsej 17.9 për qind

Të huajt në Zvicër jo vetëm që nuk shfrytëzojnë mbi mesatarisht shërbimet sociale si ato të invaliditetit, por, përkundrazi ata e bëjnë këtë nën mesataren e përqindjes së tyre në popullatën e Zvicrës. Këtë konstatim e ka nxjerrë magazina ekonomike e televizionit publik zviceran “Eco”.

Shefi i Entit Federal për Sigurime Sociale Yves Rossier i ka deklaruar kësaj magazine se shuma e përgjithshme që kanë paguar të punësuarit në Zvicër në arkën e pensioneve invalidore dhe në atë familjare e të pleqërisë (AHV) gjatë vitit 2009 është 32.9 miliardë franga.

Në grumbullimin e kësaj shume, të huajt marrin pjesë me 26.7 për qind. Ndërkohë, përqindja me të cilën të huajt marrin pjesë në përfitimet nga këto arka është gjithsej 17.9 për qind .

Gjithashtu, të huajt që jetojnë në Zvicër sot shfrytëzojnë 25.6 për qind të pensioneve invalidore që jepen në Zvicër. Në të njëjtën kohë, ata kontribuojnë me 26.7% në fondin e pensionit invalidor.