Gjermania e mposhti Kosovën

Kosova ka pësuar nga Gjermania me rezultat 3:0. Gjermanet ishin më të mira gjatë gjithë ndeshjes

Në përballjen e parë në kuadër të ndeshjeve parakualifikuese për Kampionatin Evropian, Kosova U-19 e femrave në përballje me Gjermaninë, ka pësuar humbje me rezultat 3:0.

Gjermanet sulmuan dhe mbizotëruan gjatë gjithë ndeshjes në saje të përvojës së madhe ndërkombëtare dhe përgatitjes më të mirë fizike. Por, futbollistet e Kosovës me mjaft sukses mbyllnin korridoret dhe me një mbrojtje të fuqishme e sidomos të portieres Florentina Kolgeci arritën t’u bëjnë ballë kampioneve gjermane, shkruan faqja e Federatës së Futbollit të Kosovës.

Futbollistet e Gjermanisë qysh në minutën e 19-të goditën tërthorësen dhe në vazhdim në minutën e 31-të shënuan përmes Oberdorf. Rezultatin në 2:0 e ngriti Ziegler me një gol mjaft të dyshimtë, pasi më parë dy futbolliste të Kosovës ishin të shtrira në zonën e rrezikut si pasojë i ndërhyrjeve të gjermaneve, por gjyqtarja Ozçigdem heshti dhe pranoi golin, kur mbrojtja e Kosovës gati ishte e hutuar rreth futbollisteve të lënduara. Me këtë rezultat përfundoi edhe pjesa e parë, përcjell albinfo.ch.

Me të filluar pjesa e dytë Ebert shënoi golin e tretë në minutën e 49-të për rezultatin 3:0. Deri në  fund gjermanet sulmuan, por vashat kosovare arritën të mbrohen dhe ndeshja u përmbyllë me rezultat 3:0 në të mirë të Gjermanisë.

Kombëtarja e Kosovës ndeshjen e radhës e ka të premten në orën 12.30 kundër Islandës, e cila në ndeshjen e sotme mposhti Malin e Zi me rezultat 7:0.