Mbrëmje humanitare e boksit në Prishtinë, e organizuar nga Mustafë Kicaj

Ky organizim që është i pari i këtij lloji në Kosovë, është duke u bërë nga katër herë kampioni botëror në taiboks, Mustafë Kicaj, i cili jeton në Zvicër

“International Charity Fight’s” më 29 korrik në Pallatin e Rinisë në Prishtinë do të mbajë një mbrëmje të madhe humanitare sportive për t’i dalë në ndihmë fëmijëve të sëmurë dhe fëmijëve jetim, njofton albinfo.ch.

Në këtë mbrëmje humanitare do të marrin pjesë shumë boksierë dhe kikboksierë nga Kosova, Shqipëria, Maqedonia dhe Diasporë.

Ky organizim që është i pari i këtij lloji në Kosovë, është duke u bërë nga katër herë kampioni botëror në taiboks, Mustafë Kicaj, i cili jeton në Zvicër.

“Unë në vitin 2013 e kam filluar me bë këtë organizim për të prekurit nga kanceri. Kemi arritur shumë sukses. Kemi mbledhur shumë para. Kësaj radhe do ta mbajmë në Prishtinë. Në Zvicër kemi pasur 1 e 2 mijë shikues, kurse në Prishtinë pres që të ketë dyfish më shumë. Kësaj radhe do të ndihmojmë për fëmijët jetim dhe të sëmurë”, ka thënë Kicaj, i cili jeton në Zvicër.

Bileta më e lirë do të jetë dy euro, kurse ajo më e shtrenjta 40, por edhe shumë bileta do të jenë falas. Gjithashtu shumë sponsorë janë siguruar për këtë mbrëmje.