Kosovë, bien investimet e huaja direkte

Sipas Bankës Qendrore të Republikës së Kosovës (BQK), Investimet e Huaja Direkte (IHD) arritën vlerën prej 215.9 milionë euro, që paraqet nivel më të ulët krahasuar me vlerën prej 308.8 milionë euro gjatë vitit 2015

Gjatë vitit të kaluar është shënuar një rënie e dukshme e investimeve të huaja direkte në Republikën e Kosovës. Kështu ka njoftuar Banka Qendrore e Republikës së Kosovës (BQK), sipas të cilës, Investimet e Huaja Direkte (IHD) arritën vlerën prej 215.9 milionë euro, që paraqet nivel më të ulët krahasuar me vlerën prej 308.8 milionë euro të regjistruar në vitin 2015.

Këto statistika BQK i ka paraqitur në raportin e Vlerësimit Tremujor të Ekonomisë.

“Në kuadër të strukturës së Investimeve të Huaja Direkte, me zvogëlim të vlerës u karakterizuan të dy format e IHD-ve, përfshirë kapitalin dhe fondin e investimeve në aksione, si dhe investimet në instrumentet e borxhit”, thuhet në raportin e BQK-së, për Vlerësimin Tremujor të Ekonomisë.