Presidenti Thaçi shpërndanë parlamentin: LDK nuk e njeh Thaçin

Presidenti i Republikës së Kosovës, Hashim Thaçi ka shpërndarë legjislaturën e pestë të Kuvendit të Kosovës. Ai nesër cakton datën e zgjedhjeve. Por, LDK thotë se marrëveshja për koalicion u prish dhe rrjedhimisht nuk e njeh Thaçin për president

Menjëherë pasi Kuvendi i Kosovës rrëzoi “Qeverinë Mustafa” me mocion mosbesimi, reagoi presidenti Hashim Thaçi duke shpërndarë parlamentin dhe duke përgatitur infrastrukturën ligjore për shkuarje në zgjedhje të parakohshme. Për caktimin e datës së zgjedhjeve, Thaçi ka ftuar nesër liderët e partive politike në një takim të veçantë.

“Presidenti i Republikës së Kosovës, Hashim Thaçi, pas shpërndarjes së legjislaturës së pestë të Kuvendit të Republikës së Kosovës, do të mbaj takim konsultativ me subjektet politike për caktimin e datës së zgjedhjeve  të parakohshme për Kuvendin e Republikës së Kosovës”, thuhet në njoftimin e presidencës.

Por, Lidhja Demokratike e Kosovës e cila ka qeverisur me Kosovën, është irrituar pasi mocionin e ngritur nga opozita e ka mbështetur partneri i koalicionit, Partia Demokratike e Kosovës. Madje në një reagim të LDK-së, thuhet se kjo parti nuk e njeh marrëveshjen e koalicionit e cila ndanë qeverisjen në dy krah, LDK-së i jep kryeministrin, kurse PDK-së, kryetarin e Kuvendit dhe presidentin e Kosovës.

LDK në reagimin e fundit thotë se nuk e njeh as Hashim Thaçi si president të Kosovës dhe nuk e ka konfirmuar pjesëmarrjen në takimin e nesërm.

“Veprimi i sotëm edhe një herë e la pa asnjë maskë Kadri Veselin dhe bashkëpunëtorët e tij në PDK, të inkriminuar dhe me probleme të thella me ligjin dhe të cilët sot u bashkuan për t’i dhënë fund Qeverisë që e çliroi shtetin nga kapja e gjithanshme, që i këputi fijet e krimit dhe të korrupsionit. Me këtë veprim, Marrëveshja e koalicionit bie në tërësi dhe LDK-ja nuk e njeh asnjë pikë të saj dhe asnjë rezultat politik të saj”, thuhet në reagim.

Ndryshe, sipas Kushtetutës, pas rrëzimit të qeverisë, presidenti i Kosovës duhet të caktoj datën e zgjedhjeve brenda 45 ditëve.