Gjendja shëndetësore e ish-kryeministrit Rexhepit, e rëndë

Ish-kryeministri i Kosovës, Rexhepi disa ditë më parë përjetoi një sulm në tru. Ai po vazhdon mjekimin nën kujdes të stafit mjekësorë në mjekimin intensiv të QKUK-së

Ish-kryeministri i Kosovës dhe njëri nga politikanët më pragmatik të pasluftës, Bajram Rexhepi vazhdon të qëndroj i shtrirë në gjendje të rëndë shëndetësore, në Qendrën Klinike Universitare të Kosovës në Prishtinë.  Siç raportojnë mediet kosovare, Rexhepi vazhdon të jetë në gjendje të rëndë shëndetësore në kujdes intensiv.

Në një prononcim për Telegrafin, zëdhënësi i QKUK-së, Shpend Fazliu ka thënë se konsiliumi mjekësorë po e përcjell gjendjen e Rexhepit. Ish-kryeministri i Kosovës, Rexhepi disa ditë më parë përjetoi një sulm në tru.

“Ai po vazhdon mjekimin nën kujdes të stafit mjekësorë në mjekimin intensiv të QKUK-së. Konsiliumi mjekësorë po përcjellë në vazhdimësi gjendjen e tij dhe po kryhen konsultimet sipas vlerësimeve të konsiliumit”, ka thënë Fazliu.

Ndryshe, Rexhepi u diplomua në Fakultetin e Mjekësisë në Universitetin e Prishtinës në vitin 1979 dhe studimet pas-universitare i përfundoi në Zagreb në vitin 1985. Punoi si kirurg i përgjithshëm dhe specialist endoskopik në spitalin rajonal të Mitrovicës deri në vitin 1990.

Më pas, ai u bë udhëheqës i qeverisë hije në qytet dhe u zgjodh i dërguar i Mitrovicës në Kuvendin e Kosovës. Gjatë luftës më 1999 me Serbinë, Rexhepi i u bashkua Ushtrisë Çlirimtare të Kosovës dhe kaloi tre muaj në male duke shërbyer si mjek në zonën operative të Shalës. Pas luftës, Rexhepi shërbeu si kryetar i këshillit bashkiak të Mitrovicës dhe Kryetar i pjesës së jugut të qytetit të ndarë, si dhe kreu i degës së organizatës PDK në qytet.

Më 4 mars të vitit 2002, pas tre muaj bisedimesh dhe me ndërmjetësimin e kryeadministratorit të atëhershëm të Kosovës Michael Steiner, Kuvendi i Kosovës zgjodhi Bajram Rexhepin -kryeministrin e parë të Kosovës dhe Ibrahim Rugovën si president; të dy konsiderohen si politikanë të moderuar. Në zgjedhjet e kaluara ai ishte Ministër i Punëve të Brendshme.