Hajni, për shkak të monotonisë

Lista e delikteve të kryera është e gjatë: Një grup i të rinjve nga Kantoni i Solothurnit, gjatë vitit të kaluar kishte kryer 14 plaçkitje në rrethinën e Solothurnit dhe Bernës. Bëhet fjalë për një iranian, dy kosovarë dhe dy zviceranë, të cilët veprat e tyre i kishin kryer me një bashkëpunim reciprok, thuhet në një kumtesë të policisë, e të cituar nga e përditshmja Aargauer Zeitung.

Në periudhën prej muajit prill e deri në shtator të vitit të kaluar, grupi i rrezikshëm kishte plaçkitur rreth 55.000 franga zvicerane stoli të çmuara dhe të holla, në rrethinat Grenchen, Solothurn dhe Wasseramt, si dhe në territorin e Kantonit të Bernës, duke shkaktuar në ndërkohë edhe dëm material prej rreth 10.000 franga.

Tani, të rinjtë gjenden në paraburgim dhe shumica e tyre e kanë pranuar veprën. Motivi i veprave të kryera ka qenë monotonia, ndërsa bëhet fjalë kryesisht për kriminalitet fillestar dhe jo profesional.

Anëtarët e grupit janë të rinj të moshës në mes 16 dhe 23 vjeçare dhe me vendbanim në Kantonin e Solothurnit. Ata do të duhet të përgjigjen penalisht para trupit gjykues.