Sela: Më 11 dhjetor, shqiptarët do ta dënojnë BDI-në

Sondazhet parazgjdhore që i kanë zhvilluar mediat rajonale, LR të PDSH-së po e nxjerrin partinë e dytë tek shqiptarët, pas BDI-së së Ali Ahmetit

albinfo.ch: Zijadin Sela

Shqiptarët do ta dënojnë Bashkimin Demokratik për Integrim, e cila ka sjellur vetëm gjak dhe vuajtje për shqiptarët. Kështu deklaroi kryetari i Lëvizjes për Reforma në Partinë Demokratike Shqiptare, Ziadin Sela, gjatë një mitingu partiak që mbajti para simpatizantëve të pranishëm në sheshin “Skënderbeu” në Çair të Shkupit. Në këtë tubim Aleanca për Shqiptarët prezantoi kandidatët për deputetë dhe platformën zgjedhore të saj.

Sela nga sheshi “Skenderbeu’’ u bëri thirrje shqiptarëve që të dalin në votime më 11 dhjetor, dhe të votojnë qetë dhe me dinjitet.

“Shqiptarët nuk do të përçajnë votën, të jeni të sigurtë. Shqiptarët më 11 dhjetor do ta bëjnë bashkë votën, do ta bëjnë bashkë votën duke votuar shqiptarët dhe Aleancën për Shqiptarët. Do të dalim, sepse ne nuk kemi harruar, që në këtë shesh, nëpër këto rrugë ju i keni tërheq zvarrë shqiptarët dhe i keni gjakos ata. Ne nuk kemi harruar që ju u keni dhënë dënime maksimale vetëm e vetëm se kanë protestuar për një padrejtësi. Shqiptarët nuk e kanë harruar tymin dhe zjarrin e Lagjes së Trimave”, deklaroi Sela, citon INA.

Ndryshe, sondazhet parazgjdhore që i kanë zhvilluar mediat rajonale, LR të PDSH-së po e nxjerrin partinë e dytë tek shqiptarët, pas BDI-së së Ali Ahmetit. Nga nesër në mesnatë, Maqedonia kalon në heshtje parazgjdhore, ndërsa të dilën më 11 dhjetor, mbahen zgjedhjet e parakohshme në këtë shtet. Këto zgjedhje konsiderohen jetësore për integimin e Maqedonisë.