Kthim me probleme i azilkërkuesve nigerianë

10vor10 ka treguar xhirime ku shihet një nigerian duke kundërshtuar dëbimin i cili, për pasojë, goditet nga polici zviceran

Që nga marsi i vitit të kaluar, të enjten janë kthyer me detyrim nga Zvicra në Nigeri azilkërkuesit e parë me status të papranuar. Siç dihet, në marsin e vitit 2010 një azilkërkues nigerian kishte vdekur në aeroportin e Cyrihut, derisa policia po provonte ta hipte në aeroplan.

Dje, përmes linjës së kompanisë Swiss janë transportuar për në Lagos të Nigerisë 19 azilkërkues të këtij vendi.

Sipas Entit Federal për Migracion, fluturimi ka rrjedhur pa probleme, ndonëse parapërgatitjet në vendin e pritjes nuk kishin qenë optimale. 

Por, ndryshe e kanë regjistruar gazetarët rrjedhën e kthimit të nigerianëve në vendin e tyre. Magazina e lajmeve 10vor10 e televizionit publik zviceran ka treguar xhirime ku shihet një nigerian duke kundërshtuar dëbimin. Për pasojë, ai goditet nga polici zviceran. 

Ndërkaq, policia kantonale e Cyrihut, thotë se kjo ka ndodhur vetëm pasi që azilkërkuesi më parë e kishte goditur policin.