Arrestohen serbët që bartnin emigrantë kosovarë

Dy serbë u arrestuan pasi po bartnin ilegalisht tetë shtetas të Kosovës, në mënyrë të jashtëligjshme

Policia e Kroacisë ka bërë të ditur se ka përfunduar një hetim penal kundër dy shtetasve serbë, pasi janë kapur duke bartur ilegalisht tetë qytetarë nga Kosova, të cilët kishin hyrë ilegalisht në Kroaci, bëjnë të ditur mediat vendase.

Policia kroate gjatë një aksioni më 3 nëntor kishte ndalur një veturë me targa serbë, që drejtohej nga 38-vjeçar, shtetas serb, kurse në veturë ishin edhe katër qytetarë të Kosovës, prej tyre një i mitur, përcjell albinfo.ch.

Po të njëjtë ditë, u ndalua edhe një veturë tjetër, që drejtohej nga një shtetas serb dhe gjithashtu edhe në atë veturë ishin katër kosovarë, dy të vjetër dhe dy të mitur.

Nga hetimet është konstatuar se qytetarët e Kosovës në mënyrë të paligjshme në këmbë kanë hyrë në Kroaci nga Serbia, të cilët pastaj janë marrë nga dy drejtuesit e makinave.

Dy shtetasit serbë u ndaluan në njësinë e paraburgimit të departamentit të Istrias, për shkak të shkeljes së Ligjit për të huajt. Qytetarët e Kosovës janë larguar nga territori kroat, në vendkalimin kufitar Tovarnik, ku i janë dorëzuar Policisë së Serbisë.